Douane tin reglanan estricto, segun hefe di Douane, Ricky Croes. Awo un tipo di boto cu no ta bin mas, ta e peñeronan, of lanchanan, esta botonan cu ta habri.
Eseynan no ta botonan cu ta apto pa carga. A prohibi eseynan di yega, pasobra no ta botonan cu lo por yega Aruba cu carga. Ta e unico diferencia cu tin. Por lo general tur e otro botonan ta yegando normal.
Entrada
Croes a sigui splica cu pa loke ta trata waf, hopi biaha Douane no tin hopi di gana eynan. Pasobra cu loke ta fruta, berdura, pisca, tur ta 0%. Si tin cu bisa cu tin un miho control, pasobra e control na waf, mayoria di biaha ta bay riba niet-fiscale taken, cu ta tareanan non-fiscal di Douane. E tarea cu ta por ehempel riba arma, droga, carni cu ta drenta. Tur hende sa cu carni no mag drenta for di Sur America. Tambe otro cosnan cu ta drenta ilegal, manera remedi, ta e otro tareanan cu tin eynan. E control di Douane ta hopi mas estricto.
Siguridad
Por ta sigur cu cada boto cu yega waf, e control ta cuminsa na Venezuela. Ta un control basta estricto cu ora cu e botonan yega, por tin basta siguransa cu nan a haya un control caba. E acuerdo cu Venezuela ta, cu nan ta controla tur cos, nan ta wak tur e documentonan ta na ordo y ora tur e botonan ey yega eynan, ya tin tur e papelnan y por djis verifica cu tur e cosnan ta na ordo, segun Ricky Croes.
Na Aruba ta verifica si tur cos ta na ordo. Si tin cualkier barco cu pa un of otro motibo no ta biniendo of no ta saliendo, esey por bisa cu tin mas di haber cu e autoridad Venezolano y cu nan tambe tin un control estricto na Venezuela mes.
Exigencia
Pa e parti control, e barco mester ta registra, e mester tin tur su documentonan pa loke ta trata nabegacion. E mester ta apto pa nabega. For di eynan ta haya cu tur e productonan mester tin tur su documentonan aduanal. Henter e tripulacion mester tin nan documentacionnan di imigracion pa nan por sali for di eynan. Eynan ta haya cu Seniat, cu ta esun cu ta haci e controlnan eynan. Aki na Aruba, ta haya e documentonan for di capitania de puerto di eynan. Tambe ta hay’e for di e secretario di exportacion. Una bes cu tin tur e papelnan ey, sa cu e botonan ey por drenta. Naturalmente na Aruba tin e extra control, pero en principio ta verifica cu e papelnan ta corecto. Si tabata tin barco cu a manda bek.
Tin acuerdonan cu ta bay riba e bevoegdheid di cada dienst cu ta traha, esta Directie Scheepvaart, Havenmeester, cu por manda barco bek. Den e caso di Douane, no por mand’e, esey ta pa e motibo cu tin e control di ora cu e barco yega, pasobra Douane tin su tarea. Ta keda cu e supervision riba dje. Pero autoridadnan, cu segun ley ta actua prome, y ta depende di ki potestat cu nan tin ta. Douane no tin e potestat pa manda e barco bek. E ora ta keda riba e mercancia so. Lo no wak por ehempel nada cu tin di haber cu imigracion of nabegacion.
Corsou a sigui Aruba
Aruba tabata e trendsetter. Aruba y Falcon tabata tin acuerdonan bilateral. Despues Corsou a tum’e over. Nan ta suppose di ta actuando mesun cos, pasobra e acuerdonan cu a wordo traha entre Aruba y Falcon, a wordo tuma tambe pa e otro islanan, segun Croes.
