Despues cu siman pasa diasabra Copa ABC a inicia y e ekiponan cu lo sigui pa e siguiente fase di e torneo a bira conoci, e torneo lo continua mañan diasabra na Corsou y Boneiro. Na Corsou e ekipo di SV Jong Holland di Corsou lo enfrenta SV Dakota di Aruba y na Boneiro SV Real Rincon lo enfrenta e ekipo di SV Vesta di Corsou.
Presidente di Arubaanse Voetbal Bond (AVB), Ing. Richard Dijkhoff, a splica cu e wega ta pa 8’or di anochi y Dakota lo hunga den stadion Eriglio Hato, mientras na Boneiro e wega lo ta na stadion Antonio Trenidad na Rincon. Despues di e weganan aki, e dos ganadonan lo enfrenta otro dia 29 di September pa saca e campeon di Copa ABC. E stadion na unda e final lo tuma luga ta depende di e resultadonan di ambos partidonan di mañan, pa mira cua di e ekiponan termina na prome luga.
Pa e amantenan di futbol cu kier mira e wega di Dakota contra Jong Holland, AVB ta haciendo tramitenan pa por “stream” e wega riba e pagina di Facebook di Arubaanse Voetbal Bond – AVB.
