Richard Arends: Gasto di oficina, huur y abogado a keda mescos

428

Minister di Finansa, Asuntonan Economico y Cultura a bin diahuebs mainta pa duna Parlamento un splicacion riba e informe riba ehecucion di presupuesto 2020 pa e prome mita di aña. “E presupuesto di emergencia aproba na maart a conta cu un caida di 50 pa 60 porciento di entradanan y p’esey e informe ta mustra un desaroyo relativamente positivo,” Parlamentario Arends a splica.

“Mirando cu e cifranan den e informe aki ta wordo compara cu e presupuesto di emergencia, nan no ta duna bista real di e desaroyo di nos entradanan. Durante e reunion Parlamentario Arends a haci un apelacion na e mandatario pa inclui resultadonan di aña 2019 como punto di referencia pa por haci un comparacion mas realistico.”

Entretanto a yega Parlamento e Presupuesto Supletorio 2020. “Esaki ta hopi mas prome cu loke ta usual, mirando cu presupuestonan supletorio ta yega den luna di october of november normalmente. Hecho cu el a bay Raad van Advies ya caba for di luna di juni y a yega Parlamento na september y ta mustra cu ta duna oido na recomedacionnan cu fraccion di AVP  a trece dilanti durante di tratamento di presupuesto 2020 na maart, unda nos a urgi gobierno pa entrega e presupuesto den fase,” Parlamentario Arends a splica.

“Na luna di maart a tene cuenta cu un ‘worst case scenario’  di un caida economico di 44% y aworaki caba e presupuesto supletorio ta conta cu un caida economico di 33%. Obviamente e efectonan riba finansa publico, comercio y mercado laboral ta hopi grave den ambos caso,  pero e tin un efecto pa loke ta trata entradanan di pais Aruba,” Sr. Arends a splica. “Riba tema di impuesto, entradanan a subi cu 130 miyon di florin – pues mas di loke a wordo premira den e presupuesto di emergencia – pero e gastonan di operacion di gobierno a keda practicamente mescos.”

Richard Arends: Presupuesto Supletorio 2020: gastonan di operacion a keda practicamente mescos

Richard Arends: Presupuesto Supletorio 2020: gastonan di operacion a keda practicamente mescos

Posted by 24ora on Thursday, September 24, 2020

“Mientras cu den gastonan di personal di gobierno a conoce un reduccion substancial door cu empleadonan publico a entrega 12.5% di nan salario y tambe ‘vakantieuitkering’, como tambe 25% di mandatarionan, nos ta wak cu gastonan operacional di gobierno a baha solamente cu 4%,” Arends a splica. “Esaki ta algo cu sigur fraccion di AVP a haci preguntanan por escrito riba dje, ya cu no ta husto cu di un banda e empleado publico ta coopera y ta solidario,  pero gastonan di operacion di gobierno, manera gastonan di oficina, huur y abogadonan ta baha marginalmente.”

Cu e Presupuesto Supletorio e deficit a baha di 1.3 biyon pa 1.1 biyon florin. “Durante ultimo simannan tabatin hopi conmocion  pa loke ta trata e bononan cu Banco Central lo a emiti na un suma di 130 miyon florin pero c’un plafbond di 400 miyon. Nos a pidi Gobierno pa duna un splicacion ki parti di e suma aki a wordo cubri cu e sosten di likides di Hulanda y ki parti di nos mesun forsa.” Parlamentario Arends ta termina bisando cu mirando cu mas cu mita di aña ta tras di lomba, mester cuminsa atende cu e lunanan nos dilanti.