E resultado di votonan individual a demostra e caranan di e berdadero ganadonan y perdedonan di eleccion 2021. Mientras cu Evelyn Wever y Marisol Lopez a resulta e ganadonan absoluto di eleccion, di otro banda Ricardo Croes y Benny Sevinger a resulta e perdedonan di mas grandi. Ricardo Croes ta bay den historia pa drenta Parlamento cu MAS voto cu tur otro parlamentario y sali bek den un periodo sin voto, ni sikiera pa asiento. Un berdadero prueba cu di berdad, politica por ta cruel.
E politico perdedo di eleccion, ta esun cu a bay mas atras den voto. E premio aki, aunke ta di consuelo, a bay pa Ricardo Croes. Un sub’i baha den voto durante un solo periodo, ta prueba cu si no cumpli cu votadonan, cu ta castiga bo mesora.
Ricardo Sindulfo Croes a inicia su carera politico den Partido RED na aña 2013 y a logra 420 voto. El a sorprende tur hende den eleccion 2017, pasobra no solamente a haci’e lider di partido, pero su campaña a yude yega te na 3359 voto cu a haci’e di 3 votegetter na Aruba, despues di Mike Eman y Evelyn Wever-Croes. Su votonan tabata mas tur minister y parlamentario. Ricardo Croes ta conoci pa su anhelo pa legalisa uzo di marihuana medicinal y recreacional riba nos isla.
Den eleccion 2021, e politico rastaman a baha di 3359 voto pa 1184 voto, cu ta representa un caida di 2175 voto! E no a haya voto ni pa saca su mes den parlamento, pa ilustra con atras el a bay. Probablemte su forma “unico” di comporta den parlamento, su posicion di a para band’i corupcion den Serlimar bou presion di POR y su actitud anti-prensa awe a percura pa su retiro di politica. El a drenta den un draaideur, mes lihe cu a drenta a sali bek tambe, hunto cu Rudy Lampe cu tambe a bay drasticamente atras!
E di dos cu a bay hopi atras ta Benny Sevinger, parlamentario di AVP, actualmente un sospechoso di husticia. El a baha di 2785 voto individual pa 1614 voto, cu ta representa un caida di 1171 voto. Aunke e politico ta insisti riba su inocencia, ta parce awo cu votadonan no a aprecia cu el a sigui riba lista. Kisas tabata miho pa el a caba di regla su asunto penal pafo di politica. Di otro banda, el a resulta e unico politico cu no ta den top 5 pero cu toch a saca su mes cu votonan preferencial!
Oslin Benito Sevinger, miho conoci como Benny, di 56 aña di edad, un karateka, a subi lista di partido AVP den eleccion di aña 2001. Prome cu esey e tabata traha como consehero di Minister Watty Vos (q.e.p.d.) y ora cu e ultimo aki a fayece na 2001, a dicidi di pone Sevinger riba lista, den representacion di “e hendenan di Watty”. Su carera tabata semper impresionante.
Eleccion 2001 – 1493 voto
Eleccion 2005 – 1403 voto
Eleccion 2009 – 2072 voto
Eleccion 2013 – 3932 voto
Eleccion 2017 – 2785 voto
Eleccion 2021 – 1614 voto
Benny Sevinger ta casa di Claudia y tin dos yiu, Stephany y Bryan. Bou su maneho a desaroya diferente proyecto historico pa nos pais, manera ta renobacion di aeropuerto, hospital, Green Corridor, ringweg 3 esta Watty Vos Boulevard y tambe e proyecto di renobacion y embeyecimento di centro di Oranjestad, cu a inclui adkisicion di un tram.
E di tres cu a cay hopi ta lider di AVP, mr. Mike Eman, cu a mira su votonan baha su dilanti. Pa 5 eleccion consecutivo Michiel Godfried Eman a lidera Partido di Pueblo Arubano (AVP) y a bira vote getter di e eleccionnan 2005- 2009- 2013 y 2017. Mike Eman a haya 6.188 voto na 2005, 8.068 na 2009. Remarcabel tabata e resultado siendo un Prome Minister den gobierno el a crece den voto na 2013 cu no menos cu 8.222 voto cu a representa 14% di e electorado (valido). Na aña 2017, Eman ta bira vote getter atrobe cu 7.822 voto riba su nomber. Na 2021 Eman a ricibi un total 6.668 voto, pues un caida di 1.154 voto riba su nomber.
Algun factor aki ta hunga un rol, pero e hecho cu Mike Eman a tuma un decision emocional y mucho abrupto pa tuma retiro y no drenta parlamento na 2017 a hinc’e den e posicion aki awo. Ora pueblo tabatin mas mester di dje, e tabata ausente. Como vote-getter no tin un excuus pa no a drenta parlamento y representa bo votadonan. Di otro banda, henter e campaña aki no a sintie su mes y no tabata alcansa ningun climax politico manera a custuma di dje. Di otro banda Eman a hay’e ta guia un team demotiva y sin e energia y dinamismo di semper pa supera y crece. A pesar di su caida, el a keda na di dos vote-getter di Aruba, cu un realidad cu AVP, cu tabata depende 33.5% di dje den eleccion 2017, awor ta mas dependiente di Eman, pasobra su votonan ta representa 36.4% den eleccion 2021.
E di cuater cu mas a cay den voto ta minister demisionario mr. Xiomara Jeanira Maduro, naci dia 24 di december 1974. El a participa den eleccion Parlamentario pa prome bes na aña 2009 y a haya 260 voto individual. E tempo ey el a asumi e puesto di parlamentario pa fraccion di MEP. Su popularidad a crece casi 10 biaha mas hopi den eleccion 2013, logrando no menos di 2445 voto riba su nomber y a sigui den funcion di parlamentario. Den eleccion na september 2017, e candidata # 2 riba lista di MEP a haya 2696 voto. Dia 17 di november el a huramenta como Minister di Finansa, Asuntonan Economico y Cultura den Gabinete Wever-Croes, forma pa e coalicion di MEP(9), POR (2) y RED (1). Pero siman pasa den eleccion, el a para mira su votonan bin abou den gran forma, for di 2696 pa 1883, cu ta traduci den un caida di 813 voto!
Tradicionalmente ministernan di finansa no sa bay dilanti den eleccion, pero tanto atras tampoco! E mandatario, cu a core un campaña grandi cu hopi propaganda, cu borchi tur rond di nos isla, no a logra convence ni su votadonan existente pa e por a mantene su votonan, t’e pa e por a crece mas. Kisas su forma di lidera, sin dialogo y sin participacion, a haci cu sindicatonan mes no tabata reuni cu me mas, sino directamente cu minister presidente. Tur hende sa cu ta Nilo Swaen ta maneha e ministerio y cu e ultimo palabra tabata di Evelyn Wever. Su falta di dominio di e materia a resalta y su votadonan a castig’e den eleccion. De facto, e ta #2 riba lista pero cu e resultado aki e ta #4 den voto, despues di Evelyn Wever, Dangui Oduber y Glenbert Croes. Probablemente den siguiente eleccion lo bah’e di puesto riba lista tambe.
Pueblo votado a sali rabia e eleccion aki y a castiga ambos partido grandi y tradicional. Den esaki AVP, siendo den oposicion y cu tradicionalmente lo mester a crece, a haya e sla di mas duro. Pero votadonan no a limita e castigo na AVP y MEP so pasobra POR y RED tambe a pasa pa buki di historia den e eleccion aki. E mensahe: Pueblo no ta acept e mesun cos mas. Pa e partidonan grandi: Sea ta reforma of ta disparce!
