Salud mental na Aruba ta deteriorando hopi lihe, dr. Hendrikus van Gaalen, director di Fundacion Respaldo a comenta na inicio di un conferencia di prensa diaranson merdia.
E ta sigui splica cu e lista di espera di Respaldo, como di e otro organisacionnan manera Departamento di Asunto Social, como tambe SPD y tambe FMAA ta largo.
Van Gaalen ta sigui splica cu no solamente COVID-19 a hunga un rol den e proceso aki, sino cu malesanan riba nan mes a bira hopi mas compleho, peligroso y esey tambe ta pone presion riba cuido di salud, riba dokter y enfermeronan cu ta yegando na un punto cu nan por ‘burn-out’.
Awo Hulanda kier entrega 60 miyon florin pa aña riba cuido medico. Ta den peliger caba. Mester di mas hende profesional y awo tin cu entrega e suma ey pa aña cu ta increibel, segun e medico.
Respaldo por ehempel mester a para cu hopi cos. Por ehempel casnan pa hendenan cu mester di dje. Mester a para POH na dokternan di cas. Tur dokter di cas tambe ta yen yen. Nan mester di hende pa yuda nan cu pashentnan di problemanan mental cu no ta asina leu cu tin cu bay Respaldo.
No por mas, pasobra no tin placa mas. Y mester di mas psicologo, pero esey tampoco no por, pasobra mester economisa.
Sinembargo cuido mental ta mas riba un banda malo compara cu otro cuido. Door di e pandemia, ta haya hopi otro problema mental. Ta haya depresion, ta haya trauma, door cu e mayor a bay hospital, a fayece, of cu e mester a keda cas.
