Regla y procedura pa cu trafico maritimo entre Venezuela y Aruba

Desde cu a anuncia cu e frontera cu Venezuela lo habri, un comision a wordo lanta pa yega
na acuerdonan transparente entre pais Aruba y Venezuela.

E comision a ser yama “Commissie Grensopening Venezuela”, den cual e diferente departamentonan kendenan ta traha na frontera ta reuni pa yega na un proceso acceptabel tanto pa Aruba como Venezuela.

Departamentonan cu ta forma parti di e comision ta: Directie Scheepvaart Aruba (DSA),
APA/ASTEC, IASA, Departamento di Aduana, Cuerpo Policial Aruba y Kustwacht.
E comision kier splica con e proceso ta hinca den otro pa asina pueblo por compronde. E
pasonan pa un boto di carga of di placer por drenta Aruba ta como lo siguiente:

1.  DSA, previo na salida di un embarcacion, ta haci e control ariba e legalidad di
   documentacion, manera e vertrekpas of zarpe y e documento di exportacion cu mester
   ta valido y registra na Venezuela.
   Despues di eynan e ta pasa pa ASTEC na unda:
2. ASTEC lo haci su controlnan necesario riba pre-arrival, registracion di e botonan di
   carga y esunnan di placer. Den e fase aki tin contacto intensivo cu e Capitania di Venezuela
   encuanto e documentacion.
   Den caso cu den e fasenan 1 y/of 2 algun di e documentonan no ta valido, e boto no ta
   wordo permiti pa drenta Aruba, pues e NO ta wordo ingeklaard. Si, lo haci e control
   necesario pa verifica si e boto ta apto y sigur pa sali bek y pa bolbe su pais di origen.
3. IASA ta eherce control ariba e documentonan di e tripulantenan pa asina nan por
   wordo ingeklaard/uitgeklaard. Den caso cu e documentonan no ta na ordo, e boto y su
   tripulantenan NO ta wordo ingeklaard y lo mester bai bek.
4. Departamento di Aduana ta controla e mercancia/carga cu ta abordo pa
   mercancia/carga cu mester paga invoerrechten y accijnzen, pero tambe pa mercancianan
   prohibi.
   Na final di e proceso tur 4 departamentonan mester duna nan aprobacion pa asina e boto
   y tripulante por haci nan entrada na nos isla conforme nos leynan y e acuerdo entre Aruba
   y Venezuela.

E “Commissie Grensopening Venezuela” ta spera cu nos por a informa pueblo y medionan
di comunicacion debidamente con cada departamento ta eherce nan trabou den e proceso
di entrada di botonan di carga y di placer for di Venezuela.