Cantidad record di boto y 1200 Kilo di pisca a drenta durante e torneo Diadomingo ultimo piscadonan di Aruba henter a celebra Dia di Piscado cu un torneo di pesca y un gran dia di famia, cu a presenta un dushi festival di cuminda di lama.
Tur esaki a tuma luga na Centro di Pesca Hadicurari. E aña aki un cantidad record di 50 boto a inscribi na e torneo di pesca.
For di den oranan di marduga piscadonan a bay pisca pa yega bek tera den oranan di atardi, y asina pisa un total di casi 1200 kilo di pisca valido.
Por a mira cu e piscadonan a uza e camisanan di seguridad cu e Centro mes a duna nan, cual a marca un precedente pa nos piscadonan local.
Bon ambiente
Maske cu awacero a hunga un rol importante henter e dia aki, esaki no a kita pa e piscadonan, nan famianan y demas asistente celebra Dia di Piscado. Tabatin bon ambiente musical durante henter e evento y mas cu claro acompaña pa dushi cuminda di lama crioyo. E atendientenan a gosa di un bon ambiente local y a keda entreteni cu e pasion di piscamento di nos localnan.
Ganadornan Mayor Ehemplar:
Tabatin diferente categoria di premiacion:
- Ganador di e Pargo Cora mas grandi tabata pa e boto Shoustienne di Chin Kelly y famia, cu un pargo cora di 6.1 kilo.
- Dorado di mas grandi a bay pa e boto Shakim di Capitan Raul Croes y Rocky Petrochi pisando 7.2 kilo.
- Boto di Rudshirley di Capitan Louchi Edwardo y rumannan Nacho y Nando, a pisa un Carpitan gigante di 9.1 kilo.
- Mayor Ehemplar Pishiporco a bay pa e boto Vilenska cu a trece un ehemplar di 2.9 kilo.
- Picuda di mas grandi a bay pa Picuda Boys di e boto Shahayra di Capitan Chin Christiaans cu a pisa 5.9 kilo.
- E boto Juliana di Capitan Yek Christiaans, Eddy Webb y Randy “Topo” Loopstok, a marca un Mulato di 10.4 kilo.
- Premio di Mayor Ehemplar Djampou a bay pa e boto Pochito di sr. Carolina, cu a trece un Djampou Rabi Gay cu a pisa 14.9 kilo.
- Premio pa Conofes mas grandi a bay pa e boto Sagmary di Capitan Mercelino Clarinda, cu a trece un ehemplar di 12 kilo.
E mayor ehemplar di henter e torneo a resulta di ta un Brasi di 26.2 kilo.
Ganadornan mayor kilahe pa categoria
- E premio pa boto crioyo cu mas kilahe a bay pa e boto Shahayra cu tabata tin 69.2 kilo. E boto aki tambe a bay cu e prome luga den categoria crioyo/tradicional y e pot cu e piscadonan mes ta pone.
- Na di dos luga den e categoria crioyo tradicional, a keda e boto Juliana di Capitan Yek Christiaans cu 66.1 kilo.
- Na di tres luga den e categoria crioyo tradicional a keda Rudshirley cu 47.6 kilo.
- Na di tres luga den categoria Open a keda Persistence di Capitan Marcelino de Jezus cu 73.5 kilo.
- Na di dos luga a keda e boto Vilenska di Omar Andrade cu 82.4 kilo.
- Ganadornan absoluto di categoria Open y tambe ganador di e pot, tabata e boto Tonino di Marcel y Leo Briesen, cu nada menos cu 142.8 kilo.
A honra dos baluarte
Manera ta e tradicion, a rindi homenahe na dos baluarte den piscamento. E aña aki tabata sr. Leoncito “Chito” Rasmijn cu a haña un reconocimento special pa su contribucion. Como fanatico ferviente di pesca di baranca y tur otro tipo di pesca, Chito ta promove piscamento den tur forma posibel. Sea riba medianan social, organisando torneonan di pesca of dunando curso na hobennan. Chito semper ta contribui na piscamento di Aruba.
E otro galaradonado di e aña aki ta sr. Francisco Franken. Conocido beheerder pa añanan largo na Hadicurari, ex-empleado di seccion di pesca di Santarosa, sr. Franken ta bon conoci den nos comunidad di piscado. Despues di a bay cu un pensioen bon mereci, sr. Franken a sigui activo como voluntario den diferente forma, tanto na torneonan como pesca den general, y ta masha aprecia cerca e piscadonan.
Gradicimento
Organisadornan, Santa Rosa y Fundacion Centro di Pesca Hadicurari, ta gradici y felicita tur piscado y participante, particularmente e ganadornan y baluartenan.
Danki na e public asistente y tur voluntario pa haci e dia uno exitoso un biaha mas. Un danki special na e generosidad di e patrocinadornan, cu un biaha mas a otorga varios premio special pa tur participante. Nan ta mucho pa menciona, pero di curason ta gradici cada un patrocinador pa nan contribucion.
