Diasabra anochi a tuma luga un bunita concierto dedica na Carlos Bislip, den cuadro cu su 40 aniversario dedica na musica.
Durante e concierto aki, Minister Xiomara Maduro a sorpresa Carlos cu un reconocemento pa su guia y aporte positivo na e formacion musical di nos hobennan talentoso di Aruba.
Carera musical di Carlos
Carlos a descubri su pasion pa musica for di edad jong. Despues di a tuma les cerca tocadonan di drummer internacional cu tabata toca na nos hotelnan, el a dicidi cu e ta bay sigui studia musica na un di e miho universidadnan renombra di musica, cu ta Berklee College of Music na Boston. Carlos a termina su estudio na Berklee y a haya su diploma di Performance Major cu Drumset como instrument principal. Despues el a sigui prepara su mes profesionalmente y a obtene su Masters Degree den Arts Administration na Boston University. Na momento cu Carlos a regresa Aruba el a bay traha, dunando les, na Arubaanse Muziekschool Rufo Wever.
Carlos tin un carera musical impresionante, e ta motor y organisado di varios concierto y festival. Alabes e ta e organisado y presentado di UNESCO International Jazz Day Concert.
Tambe el a funciona como director artistico y musical di hopi orkestra pa eventonan importante manera celebracion di 25 aniversario di Status Aparte y na Concierto Bushiribana na honor di e bishita di Rey Willem Alexander y Reina Maxima. For di aña 1990 e ta organisa e ‘Serie di Concierto di Scol di Musica Rufo Wever’ locual e ta haciendo te awo y ta conoci tambe pa e ‘camp’nan di musica cu tur aña e ta organisa pa e hobenan.
Carlos a comparti tarima cu masha hopi musico internacionalmente conoci, pa djis menciona algun, e vocalista di jazz sra. Adela Dalto, e trompetista di Jazz Tropical sr. Humberto Ramirez, e conocido timbalero Mariano Morales, e pianista di Jazz Tropical sr. Aloisio Aguiar y tambe e nominado y tambe e nominado na Grammy Award sr. Edsel Gomez.
Minister Xiomara Maduro ta remarca cu e lista di e carera musical di Carlos ta hopi largo, pero locual mas ta sobresali den e lista aki ta su amor pa musica, e amor pa su trabou y e habilidad cu e tin pa siña, guia y motiva specialmente nos hobennan riba e tereno di musica.
Un Baluarte den Cultura
Na e ocasion aki Carlos Bislip a ricibi reconocimento di parti di Minister Xiomara Maduro, den nomber di Gobierno y pueblo di Aruba, den forma di un plakkaat pa su gran aporte na e herencia cultural di nos pais.
