Rond di 10’or di mainta riba dialuna, Team di Recherche a dicidi di pone trabou abou a cuater ora despues cu mando policial no a duna nan oido diamars siman pasa.
Na sede di Polis na Shaba tabata presente Presidente di SPA, Lito Lacle, kende a conta di con e situacion a escala. El a indica cu despues di e reunion di diamars siman, unda DAR tabatin nan reunion semanal, e hefe di Recherche a bisa cla cu e no tin solucion y a biaha despues pa Corsou. E mesun reunion tabata sin presencia di hefe di Cuerpo Policial, Altocomisario Ramon Arnhem, kende no a presentá.
Como cu esaki tabata un reunion semanal, Lacle di SPA no tabata invita y no tabata sa kiko lo tabata tuma luga eyden, mientras cu Recherche mes tabata tratando di haya un solucion. E malcontento a resulta den un walk-out siman pasa despues di un rato sin resultado, y awo e team a dicidi di pone trabou abou pa cuater ora.
“Importante ta yega na solucion, y no tur ora SPA mester ta presente,” Lacle a bisa, y el a aplaudi cu DAR riba nan mes ta trata di haya atencion di mando policial.
Pero no solamente escasez di personal ta e problema. Tin tambe e asunto di overtime, unda no semper tin suficiente personal y hopi biaha no por avisá overtime di antemano. Den ley ta stipula cu mester duna e trahado un boni di cuminda ora di overtime, planifica of no. Awo den juni a anuncia e decision cu boni di cuminda lo wordo duna solamente ora cu overtime no ta planifica. “Esaki no a cay bon, y lo wordo papia riba e tema aki diamars durante e reunion cu mando policial,” un di e miembronan di directiva a informa.
Minister di Husticia Dowers, presente na e reunion, a bisa cu solamente na mesa por yega na solucion. Aunke el a compronde cu e departamento ta hopi cansa door di e falta di personal, el a enfatisa cu e situacion no ta culpa di nan, pero cu mester traha huntu pa balansa e situacion.
“Nos mester pone awa den biña. No por sigui keda pisa riba punto di tur lado, pasobra asina no ta yega na un solucion duradero,” e mandatario a indica.
Pa finalisa, e mandatario a bisa cu tin proposicion interno pa solucion, pero el a enfatisa un bez mas cu ta na mesa mester sinta. Esey ta e direccion cu el a duna pa busca solucion.
