Den fin di siman a tuma luga e culminacion di celebracion Dia di Portugal. Pa tres dia a tene diferente actividad.
Nelio gomes da silva, consul honorario di Portugal y presidente di Asusacao social cultural portuguesa, a conta cu Dia di Portugal ta 10 di juni y ta celebra Luís de Camões, Dia di comunidad Portugues rond di mundo. A culmina e dia cu show cultural.
Aunke e fiesta ta di tres dia, nan a cuminsa cu esaki dia 6 di juni. Riba e dia aki a tene Festival di Canto na Portugues. Dia 10 di juni nan a celebr’e cu un Santo Sacrificio di Misa, Dia Naicional di Portugal. Y por ultimo a culmina cu show cultural.
Riba e ultimo anochi tabatin show cultural, folklorico, tin musica y cuminda Portugues na Primavera.
Dia di Portugal ta uno grandi, pasobra tambe ta conmemora e Portuguesnan cu a inmigra hopi aña na Aruba. E dia nacional ta dedica nan e Portuguesnan ey, unda cu a trece e tradicion y cultura, un legado Portugues.
E lusonan Arubano, yiunan, descendiente Portugues, naci na Aruba, ta creciendo. Semper nan kier mantene bibo cultura Portugues.
