E Secretario di Estado di asuntonan interno y relacionnan den Reino di Hulanda a yega Aruba awe tardi den avion di Gobierno Hulandes. El a bin hunto cu un delegacion y lo pasa Boneiro, Aruba y Sint Maarten. Awe el a bula for di e isla di flamingo pa Aruba y ta hospeda den Renaissance Resort. E tin un agenda pisa desde mañan diamars y diaranson, den cual lo reuni cu Gobierno di Aruba, cu fundacionnan y organisacionnan priva.
Durante e bishita di trabou di Secretario di Estado Raymond Knops, e lo tin reunion cu algun Minister individual y tambe cu Conseho di Minister den su totalidad. Meta di su bishita ta pa atende cu e tema di e landspakketen, pa hunto delibera riba tur e condicionnan y pa mira unda mester di mas asistencia of clarificacion.
“Pa dia 1 di februari mester yega na un uitvoeringsagenda, palabracion di ki tempo y ki aña ta bay ehecuta e diferente puntonan den e landspakket. Esaki ta algo cu ya Aruba ta preparando pa presenta di acuerdo cu locual ta kere cu Aruba por cumpli cu ne”, asina Prome Minister mr. Evelyn Wever-Croes a duna di conoce den un relato.
Foto: Jason Inesia (24ora.com)
Alabes Premier Wever-Croes a informa cu a cumpli cu e landspakket y e deadline di 15 di december 2020. Pa e deadline di 1 di januari a cumpli cu casi tur cos y loke cu no a logra, ta den e proceso legislativo (leynan), pero nan ta encamina caba. Ademas a ricibi e prome mita di e financiamento pa e prome kwartaal di 2021 y lo ricibi e di dos mita asina cu CAFT verifica e presupuesto y e yega Parlamento.
Pa loke ta e bishita di Secretario di Estado Raymond Knops, aki na Aruba e lo tin un audiencia plania cerca Gobernador Alfonso Boekhoudt, pa despues e bishita Dr. Horacio Oduber Hospital. Despues di e dos reunion y bishitanan aki, e lo sigui cu combersacionnan cu respectivamente Minister President mr. Evelyn Wever-Croes, minister mr. Andin Bikker (Husticia, Siguridad y Integracion), Conseho di Minister y Procurador General mr. Ter Steege.
E Secretario di Estado ta pasa tambe cerca entre otro Cruz Cora, Aruba Hotel and Tourism Association (AHATA) y cerca Banco di Cuminda pa discuti consecuencianan cu Coronavirus tabatin pa nos isla.
