E opinion di Raad van State sigur ta un golpi pa Aruba y otro islanan Hulandes den Caribe cu kier yega na un “Geschillenregeling” y evita cu Hulanda den forma “unilateral” ta tuma decisionnan sin cu Aruba of un di e islanan por haci algo.
Presidente di Parlamento Ady Thijsen tabata esun cu durante e ultimo reunion entre Parlamentarionan na Hulanda a presenta un proposicion pa e “Rijkswet Koninkrijksgeschillen” cu mester a bay pa Tweede Kamer.
Den e proyecto di ley cu a keda presenta ta papia di un seccion apart pa “Koninkrijksgeschillen”, cu mester wordo incorpora bou di Raad van State. Un mayoria di Tweede Kamer a vota pa e amienda adapta di Thijsen. Esaki a sosode na final di luna di april ultimo.
Mientrastanto Raad van State tambe a haya e documentonan necesario y ya caba a expresa cu nan no ta mira e instancia aki ta hunga un rol den e organo di “Geschillenregeling”. Nan a bisa den un carta di contesta cu e amienda di e Rijkswet cu aworaki ta na Eerste Kamer, den nan opinion, mester wordo bari for di mesa. Esaki por lesa di e reaccion di Vice Presidente di Raad van State, mr. Thom de Graaf.
Manera sa, e rijkswet “Geschillenregeling” ta encera un sistema independiente cu mester atende cu e diferencianan huridico den interpretacion di Statuut. E resultado di esaki no ta mara Conseho di Minister di Reino na nada y ta solamente un conseho, cu solamente basa riba motibonan di peso por wordo rechasa.
Den un amienda di e proposicion di ley, Tweede Kamer a scoge pa bini cu un seccion di “Koninkrijksgeschillen”, den cual Hulanda, Aruba, Corsou y Sint Maarten tin representacion. Raad van State ta bisa cu e intencion di e organo aki no ta motiva y desvia for di e proceduranan existente pa loke ta diferencianan di opinion, den Raad van State.
E forma con e seccion nobo ta hinca den otro, ta trece cun’e cu un diferencia den e Conseho di Minister di Reino, ta bay pa e seccion di “Koninkrijksgeschillen”.
Miembronan di e diferente paisnan ta bay haya nan mes den un posicion dificil pasobra nan no ta independiente berdad, pero nombra door di nan pais. Esaki ta trece cun’e cu toch nan mester tene cuenta cu e argumentonan presenta door di nan pais den e discusion. Cu esaki e posicion independiente di Raad van State ta bini na discusion y tambe nan autoridad.
