Diamars durante dia a drenta informe di un speedboat turistico completamente drumi den su banda den lama. Naturalmente cu esaki a hala atencion di tur esnan presente na e beach di Arashi.
Ta trata di un boto cu nan ta uza pa huur cu turista pa asina nan por disfruta di nos lama durante nan bishita. Un eror “chikito” di e capitan di e boto di 33 pia aki, cu ta registra bou A-2538, a pone cu e boto a yena casi por completo cu awa y cu consecuencia cu el a keda mita bou awa.
Capitan di e boto no a tene na cuenta cu lama ta bruto y cu na momento di yega na canto cu e olanan lo a keda sut’e y push’e cu awa, poniendo asina cu e boto lo a keda ricibi awa paden. No a keda nada otro cu laga e boto na e sitio y duna chens pa laga e lama bruto baha un poco y mira ki posibilidad tin pa saca esaki for di e situacion cu e ta den na e momentonan aki. Tur indicacion ta duna cu esaki lo no por ta posibel awe mas y lo tin cu warda te cu mañan pa purba rescata e boto aki for di den awa. Tin cu gradici cu no tabata tin ningun herido, ni turista abordo. Ta unicamente e capitan y cu suerte na su banda, no a resulta herida den ningun forma. E dia di awe no tabata su dia.
