E residentenan di Montaña Plaza Residence ta disgusta cu e promesa di mas cu 20 aña pasa pa construi un luga di hunga pa muchanan, awo ta bay uza e espacio pa construi un cas. Esaki ta bay en contra di loke tabata un promesa haci, como parti di e compleho.
A combersa Olga Londoño, un di e personanan cu a cumpra un propiedad den e area residencial aki, y a expresa di ta papia den nomber di mayoria di e propietarionan. “Nos ta sinti cu nos tin derecho pa protesta riba e situacion aki. Nos a cumpra e cas entre 20 y 23 aña pasa cu un area cu tabata destina como un area di diberticion. Den tur e añanan cu a pasa, a haci uzo di e espacio aki y a percura pa su cuido tambe,” Londoño a conta.
E pida tereno ey no ta solamente un luga di hunga of pa diberticion, pero tambe tabata un punto di encuentro pa e habitantenan durante fechanan special. “E ta nos espacio y nunca a wordo informa cu e ta na benta y a consider’e di nos como area di encuentro.” Esun cu ta desaroya e proyecto nunca a informa e grupo di kico lo bay pasa. Ta papia aki di casi 40 famia cu ta biba eynan.
Esun cu a cumpra e tereno ta Jose Mendez, kende a bisa cu e tin tur papel legal, den su man, cu e ta doño di e tereno awo.
Pa un relato mas amplio, lesa siguiente edicion di TREMPAN.
