Un comedia total a tuma luga den nos Parlamento durante tratamento di ley di BBO na frontera. Prome cu e BBO na frontera (BMEP) drenta na vigor ya hopi negoshi a hisa nan prijs caba y pa prome di augustus lo bolbe aumenta prijs kiermen un efecto sigur di 14%. Gobierno no a worry cu gremio comercial mucho menos cu gremio sindical.
Gobierno ta sigui aumenta su gastonan den e presupuesto supletorio (suppletoire begroting). Un miembro di partido Raiz a laga su bos resona cu lo no aproba e ley di BBO na frontera si no inclui logopedie den AZV. Augustus lo yega e parlamentario aki lo mira cu e lo no wordo inclui den AZV. Nos ta kere miho partido Raiz a pidi pa nos adultonan mayor y esunnan sin trabao no paga na eigen bijdrage ora nan mester bay botica pa nan remedi. Nos ta mita di juli y ainda no tin ningun novedad kico lo bay pasa cu SABA.
Nos tin un gobierno cu no ta interesa den salud ni cuido di nos adultonan mayor. Tampoco no ta interesa den esunnan cu no tin trabao. Nos tin un gobierno cu ta gaba manera sucu ta gaba su mes pero cada dia cu pasa nos pais en bes di prospera ta bayendo atras. Esaki ta e agenda cu nan ta sigui esta maltrata nos pueblo. E problema aki ta cuminsa bati na pueblo su porta caba y ta bibando e den carni propio. Cuanto mas nos pueblo lo bay tolera e situacion cu ta manera un time bom. E holoshi ta sigui tik te ora e bisa booom.
E negoshinan por aumenta nan prijs pero si no tin cumprado lo no tin ganashi. Pueblo tin cu wanta e sla pa mal maneho di gobierno. Riba dje e comerciantenan a dicidi di bay over na placa cash paso nan tambe mester defende nan ganashi sino nan mester paga mas na administracion di banco. Un tempo e stationnan di gasolin tambe kier a stop e sistema di swipe. No keda straña si esaki bay pasa tambe. Parce cu awor SIAD por haya acceso na bo cuenta bancario entrante januari 2024. Nan por haya sa cuanto savings of time deposit bo tin. Pocopoco nos pueblo ta perdiendo su privacidad. Pueblo esaki ta e modelo socialista/comunista.
Ora un gobierno den manera dictatorial ta pone medida riba lomba di pueblo ya nos pueblo no tin bos mas. Aruba ta un pueblo pluma cu mester biba na rudia. Gobierno ta caba cu dignidad di nos pueblo. Durante campaña a priminti di goberna sin medida awe pueblo ta esclavo di medida. Gobierno di partido MEP aki a hinca nos pueblo den un mega debe financiero cu cooperacion di nos banconan local. A subi mercado internacional y awe nos pueblo ta mara na debe te cu 2037. Tanto partido AVP y MEP tin nan firma poni bao di e mega debe. Durante periodo di gobernacion di partido MEP di 2001 pa 2009 a viola articulo 29 di nos Statuut pa fia placa den exterior. Cada bes cu refinancia nos debe nacional mester paga tanto nos banconan como esun den exterior un interes halto. E presupuesto 2024 lo no bay tin un surplus pa via gobierno no tin un maneho ni un vision. Nan programa di gobernacion ta hinca Aruba den debe y pone medida riba lomba di pueblo. Pocopoco e clase media ta disparce.
Nos ta den un recesion mundial y nos por a mira cu KLM ta baha su cantidad di vuelo y na Merca tambe situacion ta bira pio. Nos ta den e tormenta perfecto y pronto nos lo tende cu economia mundial a crash y e banconan ta dal nan porta cera. Un general militar Americano a bisa cu e banconan lo por dal nan porta cera pa 21 dia. Lo no tin atm y tampoco lo por swipe. Nos bon Dios ta duna nos gobernante un tempo pa nan arepenti, pero e tempo pa arepentimento tambe tin un fecha cu ta caduca. Laga nos warda riba e tempo perfecto di Dios pa mira Dios su husticia. Locual cu nos gobernante- y parlamentarionan a sembra nan lo cosecha awor. Cada paso cu bo dal tin consecuencia. E por ta bon of e por ta malo. Partido Curpa ta keda e unico alternativa.
