Minister Sander Dekker a presenta un proyecto di ley den cual ta elimina e famoso “libertad condicional” ora di sinta castigo di prizon na Hulanda. Cu esaki, e ta cumpli cu deseo di basta tempo di e derechistanan den Parlamento (Tweede Kamer), segun Volkskrant. Den e codigo di procedimiento penal di Hulanda y di Aruba tambe, presonan condena na un castigo di prizon, ta sinta solamente 2/3 parti pasobra duna e preso 1/3 parti den libertad pa bon conducta. Pues un criminal cu haya 18 aña di prizon, lo sinta solamente 12 aña. E ultimo parti di e castigo, por pas’e den libertad, bao condicion cu lo traha riba reintegracion den comunidad.
Por preveni libertad condicional, pero e preso mester a comporta hopi malo den prizon, a haci un intento di huy of tabaya inclina na comete mas violencia despues di su liberacion. Den practica esaki casi nunca ta sosode!
E principio di libertad condicional a causa hopi resistencia politico y social durante varios aña, manera e liberacion di Volkert van der G., e asesino di e politico Pim Fortuyn na aña 2002. El a haya un sentencia di 18 aña di prizon, pero a liber’e na 2014 – bou disgusto di gran parti di politiconan Hulandes.
Minister Dekker awo kier pone un fin na e automatismo aki. Den caso di castigonan di prison di seis aña of mas, Hues mester dicidi riba cada caso individual. Esunnan cu no comporta bon den prizon, mester sinta gran parti di e castigo. Libertad condicional riba dje, lo ta limita te cu un maximo dos aña.
“Nos kier aumenta e credibilidad di e sentencianan imponi,” Minister Dekker a declara den su motivacion durante un entrevista cu Algemeen Dagblad. “Si un hende comete un crimen serio, e haya un castigo di prizon di 18 aña, pero despues di 12 aña ya e ta den libertad, e ora ta dificil pa splica.”
A manda e proyecto di ley di Dekker na varios autoridad en busca di conseho, manera Raad voor de Rechtspraak y Ministerio Publico. Esaki mester ta trata den Tweede y Eerste Kamer pa e periodo di gobernacion aki, segun e acuerdo di coalicion VVD, CDA, D66 y ChristenUnie. Tambe e partidonan di oposicion PVV y SGP ya a propone den nan programanan di campaña pa limita libertad condicional. Cu esey, e mayoria di votonan den Parlamento di Hulanda parce ta garantisa.
Abogadonan penal tabata critico den e ultimo añanan di e deseonan politico. Nan ta sospecha cu Huesnan ta adapta y reduci e castigonan di cual tur esunnan na fabor pa castigonan mas severo por resulta engaña.
