Despues di a pasa varios luna dificil, tin cu bisa cu Aruba ta na caminda pa recuperacion.
Den un rueda di prensa di gobierno, Minister di Turismo y Salud Publico, Dangui Oduber a comenta di ta satisfecho con e recuperacion ta bayendo.
El a menciona cu e casonan ta bahando y a base di e positive rate, cu ta riba 8%, ta mustra cu ta bayendo hopi mas miho, yudando Aruba asina den recuperacion di nos turismo y economia.
Situacion actual na hospital, tin 3 persona interna den departamento di COVID. Tres persona actualmente ta den e departamento di ICU. Na Colombia tin 19 pashent cu ta den ICU y tambe tin un menos interna cu COVID. Pa loke ta cama tin 12 disponibel di ICU na Aruba.
Pashentnan cu a bay Colombia, mayoria di nan no a vacuna. Tin 39 pashent total cu a bay Colombia cu tabata den ICU. Di nan, 34 no a vacuna. Aki por a mira e importancia di e vacuna. 83% di tur esunnan interna den hospital no a vacuna. Di e 39 pashentnan, 13 a fayece di nan 12 di nan no tabata vacuna. Dies a bin bek Aruba den bon estado di salud y tin 16 ainda na Colombia luchando pa nan salud mehora.
TEST EVENT
For di hopi tempo caba Crisis Team ta pensando riba diferente opcion y manera con pa flexibilisa y bolbe bek na normalidad, teniendo cuenta cu COVID t’ey ainda presente. E no lo disparce completo. Segun minister Oduber, ta keda na nos con pa flexibilidad e medidanan y na un manera safe y sigur con por bolbe bek na normalidad. Pocopoco Aruba ta bayendo den direccion di e otro paisnan.
Ta p’e motibo aki mes ta preparando pa organisa e prome Test Event cu lo bira un evento cu lo organisa hunto cu SMAC/Crisis Team.
Lo bira un evento caminda cu 250 pareha por acudi. Pa por drenta e parehanan mester ta sea vacuna of presenta un test negativo. E evento lo ta den un ballroom y por baila. Lo tin un banda en bibo presente y tambe door cu ta prome test event, DVG su taskforce lo t’ey pa haci e protocol y segun palabracionnan haci pa e evento aki cana. Lo evalua despues con e evento aki a bay.
Intencion aki ta pa brinda na un manera safe y sigur oportunidad pa tur esunnan cu ta organisa evento y esunnan cu kier a organisa pa duna oportunidad pa nan tambe cuminsa organisa tipo di eventonan aki, teniendo cuenta cu e protocolnan vigente.
Esaki lo ta e prome paso cu lo tuma activamente pa cuminsa bolbe bek na normalidad. Ta fiesta cu no a organisa den hopi tempo y esaki lo ta e prome. Na Hulanda nan a haci varios test event prome cu a bolbe na normalidad.
Pa cobertura mas amplio lesa edicion di TREMPAN mañan.
