Awe merdia pa 2:00 pm, mescos cu tur diamars, Minister Presidente mr. Evelyn Wever-Croes tabatin un reunion cu Gobernador, pa delibera cu ne riba asuntonan pendiente y operacion general di gobierno. E siman aki, el a confirma cu el a caba di informa Gobernador cu Gabinete Wever-Croes II, debi na investigacion penal andando contra dje, cu a kibra tur relacion di trabou cu ex-Minister Eddie Briesen.
E ultimo aki tabata consehero di Minister Endy Croes. Di otro banda, Edison Briesen ta presidente di Refineria di Aruba (RdA), funcion cu e ta ocupa desde dia 18 di juli 2022. El a reemplasa primo di Minister Glenbert Croes, cu a reemplasa e ruman di e minister. Na final a acorda cu, den cuadro di transparencia y bon gobernacion, cu no ta bon pa tin ningun famia di e mandatario den e hunta di supervision. E ora a apunta ex-Minister Briesen den e funcion, mara na un pago mensual di mas o menos 3 mil florin pa luna.
“Mi ta lamenta cu un otro ex-minister ta envolvi den un investigacion. Pero manera mi a bisa semper, nos ta para pa integridad y nos a mustra esey den gobierno varios biaha. Nos a bin cu varios ley, nos a bin cu varios maneho. Mi a baha e gobierno anterior pa motibo di investigacion ora e partner den coalicion a bira un sospechoso, kiermen mi tin pleno confiansa den husticia y mi ta sigur cu nan lo sa di haci e investigacion aki y ami lo bisa ban laga husticia core su rumbo y manera mi a bisa semper: Esun cu comete algo cu no ta corecto, lo mester carga su responsabilidad. Esun cu haci algo malo mester sinta riba su blaar. Nos ningun ta den politica pa tene man riba cabes di ningun hende, ni con cerca nan por ta”, asina minister-president mr. Evelyn Wever-Croes a declara un rato pasa den un entrevista exclusivo para pafo di Gabinete di Gobernador di Aruba.
E prome mandatario ta nenga cu Eddie Briesen ta consehero di henter e gobierno aki. A reconoce si cu e ta den Hunta di Comisario na Refineria di Aruba (RdA) via Minister Glenbert Croes. Tambe e ta consehero di Minister di Enseñansa y Deporte, Endy Croes. Prome Minister a pidi ambos pa tuma accion y pa atende e asunto aki mesora. Nan por a scoge den convence Eddie Briesen pa sea e mes pidi retiro, sino lo retir’e!
Pa loke ta e relacion den coalicion, Evelyn Wever a subraya cu e tin tur confiansa den su partner, esta Partido Raiz y den e colaboracion entre ambos partido pa por goberna e pais. Cu sa tin diferencia di opinion, esey ta sosode den tur famia, pero nada particular cu mester desemboca den un problema. Siman pasa nan tabatin bon reunionnan y awe atrobe tabatin reunion di Conseho di Minister den masha bon ambiente.
Riba e pregunta cu si por a premira e investigacion Kwihi aki di antemano y cu kisas pesey a laga Chris Romero for di lista, e lider di MEP a contesta negativamente. El a corda tur hende cu Romero mes a opta pa keda for di lista ora cu el a nenga di acepta e number cu a dun’e pa eleccion di aña 2021. Tin un comision cu ta conseha e lider di partido y nan ta tene cuenta cu diferente criterio y a base di esey a opta pa baha Romero den number y posicion. Ora cu e no a acepta, a dun’e tempo pa pensa y recapacita y na momento cu esey no a sosode, a cera lista y continua sin dje.
Finalmente, Evelyn Wever-Croes a garantisa cu e mes no sa ainda kico e caso ta contene, ta den prensa el a tuma nota di e investigacion Kwihi. Pues, e no por a contesta nos pregunta cu si e no tabata sa di e contractnan dudoso cu su ex-colega a firma y si e no a topa cu e “dienstverlening overeenkmost” (DVO) cu mester por a pasa Conseho di Minister pa aprobacion. E prome mandatario ta nenga di sa ta di cua DVO ta referi na dje aki. Conociendo Ministerio Publico, si ta contractnan cu Conseho di Minister a aproba, tardi of trempan nan lo pidi Ministerraad pa facilita e contractnan aki y e ora numa lo haya sa ta cua DVO ta investigando awo. Te ainda no a yega na e crusada ey den e investigacion.
Tocante Eddie Briesen
Ing. Edison Briesen den pasado a ocupa un funcion den gerencia di Arubus. No a dura mucho cu Betico Croes a acerc’e y el a dicidi di drenta den politica.
- Na aña 1983 el a participa pa prome biaha riba lista di MEP y a logra 264 voto.
- Den eleccion na aña 1989 el a crece te na 492 voto personal y a drenta gobernacion, despues di algun luna ora cu Minister Daniel Leo a fayece. Desde dia 15 di augustus 1989 el a huramenta como Minister di Asuntonan Economico y Turismo di Gabinete Oduber 1.
- Den eleccion di aña 1993 el a subi te na 656 voto pero gobierno a cay un aña despues.
- Den eleccion di aña 1994 el a baha te na 396 voto.
- Tres aña despues, gobierno a bolbe cay y den eleccion di 1997 el a logra 537 voto personal.
- Den eleccion di aña 2001, Briesen a haya 673 voto riba su nomber, ora el a bolbe bira minister.
- Den eleccion di 2005, MEP a bolbe gana eleccion y el a haya 938 voto personal, su record den henter su carera.
- Den eleccion di 2009, AVP a gana eleccion su so y Briesen a baha na 559 voto.
- Mescos te den eleccion 2013 ora AVP a crece den resultado cu su votonan a baha te na 240 voto, cu tabata e record den menos cantidad di voto den henter su carera.
Durante Gabinete Wever-Croes I na aña 2017, Briesen a bira consehero di Minister Chris Romero y awo den e di dos gabinete e ta conseha Minister Endy Croes. E tabata tambe, te cu awe, presidente di Refineria di Aruba y a biaha na varios ocacion cu Minister Glenbert Croes riba misionnan di energia y refineria.
