Pais Aruba ta pasando den hopi reto e momentonan aki. Nan no tin culpa como gobierno di tur loke ta pasando na nos pais segun prome minister Evelyn Croes. Pero tin e responsabilidad si pa enfrenta reto y soluciona problemanan. Na e momentonan aki no mester hende pa tira culpa riba otro of hendenan cu no kier a carga nan responsabilidad y awo kier sali y cu awo si nan ta cla pa nan responsabilidad.
Awo ta momento cu tin cu uni y enfrenta e retonan. A enfrenta retonan social enormemente den e pais aki y ainda ta enfrentando nan. A lora manga, a bin cu un crisis plan social. A busca asistencia di instancianan internacional. Den e caso aki UNICEF y ta mira cu poco poco ta hayando e sosten y ta gosa di e confiansa bek cu nos tabata gosa un tempo. Retonan economico, un crecemento economico cu casi no tabata mira na Aruba, sino tabata pa turismo. Awor aki tin un vision cla, un vision tangible, algo cu ta concreto, algo cu ta realistico. No ta bay papia di visionnan di pilarnan enormemente grandi cu no ta realisa nan mes. Ta papiando di cinco area tangibel. Nos tur por traha hunto y por saca beneficio pa Aruba di dje.
Nos tin nos retonan financiero ainda y no a sali di esaki, prome minister a enfatisa. Danki Dios si nos ta riba e bon caminda. A traha un plan financiero. Ta hayando sosten den dje. Ta den negociacion ainda cu Hulanda pa finalisa e discusionnan riba supervision y no cumplimento cu leynan. Tin asistencia awor aki di IMF ainda na Aruba. A haya asistencia di World Bank. Y asina poco poco ta poniendo ordo den tur tema cu no tabata tin atencion p’e.
E reto di mas grandi den nos situacion financiero, ta keda gastonan di personal, cual tin preocupacion di gobierno. E siman aki a pone enfasis riba dje, e areglo di VUT, cual ta e areglo cu empleadonan publico cu ta sinti cu nan ta cla cu nan carera den e sector publico, por tuma e decision pa tuma nan VUT. Tin algun dia mas pa haci esaki. Aparte di e VUT, a tuma algun otro decision cu tin cu baha e gastonan di personal. Por bisa cu mañan e presupuesto ta sali for di man di gobierno y ta wordo firma. A yega e deficit cu a palabra cu lo yega, cual ta un deficit di 25 miyon florin. Pa otro aña e lo ta 0.5%. Si tene na consideracion cu e aña aki tabat tin un deficit di 130 miyon. A logra baha e gastonan tanto cu pa otro aña tin un deficit di 130 miyon, e ora ta compronde e magnitud di e trabaonan cu ta wordo haci y ta sigui wordo haci. Danki Dios e ta bayendo riba bon caminda, pa despues por cera e presupuesto asina aki.
Asina aki Gobierno tin su retonan. Un reto no mester bira un problema. Un reto ta un oportunidad pa busca un solucion. Den cada reto a bin cu un plan, a bin cu un vision, mas un determinacion cu tin pa soluciona nan. Prome minister a termina bisando cu e kier gradici tur esnan cu ta sostene e gobierno den esaki. Tur esnan cu poco poco ta gana e confiansa bek den gobierno aki na Aruba, internacionalmente, pasobra ta danki na e sosten y e confiansa ey, ta duna e gobierno e animo pa por continua y hunto ta trece bek progreso y bienestar pa nos pais.
