Recientemente e ekipo di 24ora.com tabata na Corsou pa un bishita di trabou. Aki ta caminda cu a bishita diferente instancia importante. Entre nan a haya e oportunidad pa combersa cu Prome Minsiter di Corsou, mr. Gilmar Pik Pisas den conseho di minister na Forti.
Durante e entrevista, e mandatario a anuncia di un forma exclusivo cu ta premira cu den 2024 huma lo sali un biaha mas for di refineria. Cu esey, por cuminsa mira desaroyo un biaha mas riba tereno di refineria. Tin hopi plan cu Gobierno di Corsou ta bezig cu ne y riba diferente tereno. Entre nan ta mirando caba pa inverti mas den enseñansa, economia, turismo y infrastructura.
E inversion den turismo ta importante pero tambe ta mas obvio cu ora bo ta invita persona bin bo cas, e mester ta na ordo tambe, p’esey lo sigui inverti den drechamento di caretera pero tambe e infrastructura di Corsou. E prome mandatario di Corsou a probecha e momento ta manda un palabra di union y positivismo pa su pueblo pa cu e temporada di fin di aña.
Tocante Gilmar Pik Pisas
Gilmar Pik Pisas ta minister-president di Corsou y alabes lider di e partido Movementu Futuro Korsou (MFK). E ta e votegetter mas grandi den historia di nos pais ruman. El a nace y crece den Banda Abou, na Soto.
El a cuminsa cu su carera den Cuerpo Policial door di caba e academia di polis na aña 1993 como e miho graduado. E prome pasonan di Pisas den politica el a hacie den PNP. Despues el a uni cu partido MAN. Na 2010, el a pasa pa e partido nobo MFK, unda cu el a logra subi te na e di dos posicion di e partido tras di Gerrit Schotte.
A eligi Pisas como miembro di Staten di Corsou den eleccion di dia 5 di october 2016. Dia 17 di februari 2017, tambe a scoge como presidente di Staten. Dia 24 di maart 2017, Pisas a huramenta como Prome Minister y tambe el a bira Minister di Husticia. El a dirigi gabinete Pisas, un gabinete transitorio cu a encarga pa prepara e eleccion di staten di dia 28 di april 2017. Despues di e eleccion, e gabinete tabata oficialmente demisionario.
Pisas a bin bek como miembro di staten despues di eleccion. Na principio di februari 2019, el a bira lider di partido MFK y e sucesor di Gerrit Schotte.
Gilmar Pik Pisas a haya un total di 16.912 voto personal convirtiend’e den e votegetter di pais Corsou durante eleccion di dia 19 di maart 2021.
