Awe nochi, ex-diputado y expolitito Dominico Tromp, miho conoci como “Domi” a bira malo na cas. Ambulance a presenta cu urgencia na su cas na Malmok, pero no obstante tur intento pa reanim’e, su curpa tabata cansa y no a logra. El a fayece na su cas, den presencia di su señora y yiunan.
Domi Tromp ta naci dia 9 di december 1935, pues a caba di cumpli 88 aña di edad. E ta casa cu Yvonne Tromp-Frans y tin dos yiu muhe, Marisol Tromp y Lelicia Tromp. E ta welo di dos nieta: Dominique Lopez y Marie Louise Lopez.
Domi Tromp tin un trayecto largo y impresionante. El a bay studia na Hulanda ora e tabatin 15 aña na Kweekschool na Baerle Nassau, Hulanda. Cu 19 aña e tabata maestro di scol y el a cuminsa duna les na entre otro scol na Santa Cruz, Paradera, Savaneta, Oranjestad y Noord. E tabata miembro di Centro Apostolico Arubano, el a traha na Departamento di Enseñansa y despues a hasta bira Diputado di Enseñansa.
Despues el a bira Diputado di Domeinbeheer, Landbouw Veeteelt en Visserij. E tabata fundado, presidente y actor di grupo teatral Mascaruba. Alabes tabata presidente di Stichting Ser’i Noka. Cu tanto aporte asina na comunidad, La Reina a nombr’e como Officier in de Orde van Oranje Nassau na 1986. Den politica el a sirbi su pueblo como miembro di Conseho Insular (Eilandsraad) y tabata lider di Partido PPA den PPA su añanan di gloria. El a keda 30 aña activo den politica.
E tabata tambe presidente di Stichting Capilla Cristo Sufriente na Madiki. Ta bon pa menciona cu Domi Tromp a milita durante 10 aña activo como hoben den AVP tempo di Shon A Eman. Domi Tromp socialmente a yuda 10 aña como Sinterklaas di Sint Jan School y mas scolnan.
Headlines Group, e cas editorial di 24ora.com y Trempan ta expresa nos palabranan di mas profundo condolencia na henter famia. Cu Domi sosega na paz.
