Den parlamento e siman aki tabatin tanto reunion di presupuesto 2024 pero tambe mester a pasa e ley adapta di LAft, di supervision financiero. Durante e ultimo reunion aki a bini un sorpresa di e partner chikito di coalicion.
E dos miembronan di e fraccion di RAIZ a dicidi di presenta un mocion cu tabata iniciativa di un partido di oposicion y despues a vota na fabor di e mocion aki.
Tabata trata di un mocion cu tin di haber cu e prestamo di 915.5 miyon florin cu e gobierno cu nan ta sostene, a haci na Hulanda. E mocion ta papia pa e pago di e suma aki wordo hinca den un Aruba Investment Fund. E fondo aki lo uza den proyectonan sostenibel.
Tur cos ta mustra cu esaki no a cay mucho na agrado di e partner grandi di coalicion y por a sinti na momento cu Minister di Finanza Xiomara Maduro y parlamentario Misha Raymond a papia, tabatin un tiramento di palabra.
“Betico a siña nos cu solamente ora cu nos ta uni, nos ta logra. Pero el a laga nos sa tambe cu den e trayecto di cualkier meta ta topa cu hopi traidor …,”esaki Minister di Finanza Xiomara Maduro a bisa den parlamento ora cu el a conta kico e ta recorda di Betico Croes, fundado di partido MEP.
Den su disertacion e mandatario a bay riba e personahe di Betico Croes “kende a logra hopi pa nos pais. El a bay hopi hoben, cu apenas 48 aña pero el a laga nos cu hopi enseñansa. El a mustra cu nos mester tin curashi, mester tin strategia …..”
Traidor tabata existi den tempo di Betico Croes caba, Maduro a trece dilanti. “Pero el a siña nos pa mira nan y atende cu nan tambe.”
Misha Raymond, di partido RAIZ, di su banda a bisa cu “na final di dia nos mester keda purba, keda lucha y bringa pa e miho escenario pa nos pais,”el a bisa tratando di splica di e forma aki e motibo di nan postura. Y a enfatisa cu cada un, esta gobierno y parlamento, tin rolnan diferente. “Nos a wordo scogi door di pueblo pa traha pa pueblo.”
El a enfatisa cu e mocion en cuestion, ta un expresion di parlamento.
