Diadomingo mainta a tuma luga na Bestuurskantoor e traspaso di mando simbolico pa Prins y Pancho 2023 pa Carnaval 69. Prome Minister mr. Evelyn Wever-Croes, den su discurso dirigi na e monarcanan di Carnaval y na e publico presente, a expresa cu pa Gobierno di Aruba, e ta un placer y honor pa habri porta di e oficina di gobernacion pa ricibi nos celebridadnan di Carnaval 69.
“Despues di 2 aña sin por a celebra na e manera di custumber e manifestacion cultural di mas grandi riba nos pais, cu hopi entusiasmo mi a tuma nota con nos pueblo a prepara pa porfin por subi caya den un forma sano pa explota e creatividad unico y magestral cu nos so por!
Nos Gobierno semper t’ey pa scucha tur hende p’esey cu hopi atencion mi a scucha e decreto di nos prins y pancho y e deseo cu nan tambe tin. Tur deseo tin su reto, ohala nos por haci tur e cambionan den un cera y habri di wowo, pero nos lo tene cada un di e puntonan ricibi den consideracion. Gobierno di Aruba semper a aporta na carnaval. E aña esaki ta e caso atrobe di cual mi kier a yama un danki na tur nos departamentonan cu ta trahando pa nos por celebra e fiesta aki y hacie exitoso”, Prome Minister a expresa.
Na e ocasion aki, Prome Minister a gradici e team di Cuerpo Policial Aruba, Ambulance, Brandweer, DOW, Serlimar entre otro pasobra sin nan esfuerso y dedicacion dificilmente nos por celebra riba cayanan di Aruba. Tambe Prome Minister a yama danki na e organisacion di SMAC cu un biaha mas a percura pa Aruba celebra su carnaval.
Prome Minister a entrega na nos prins y pancho infantil e spada simbolico pa nan proteha nos carnaval di mucha. Prins y pancho hubenil a ricibi e machete simbolico pa nan defende nos hobennan den carnaval. Y nos prins y pancho grandi tradicionalmente a ricibi e yabi cu ta simbolisa cu nan tin tur mi sosten y confiansa pa habri y guia nos carnaval 69. Na prins y pancho clasico, Prome Minister a entrega un yabi di ‘spare’ pa por si acaso e prins y pancho grandi jump di mas y perde nan yabi. Tambe, cada monarca a ricibi un pin for di Prome Minister.
“Un biaha mas danki, pabien y un dushi Carnaval 69 di parti di Gobierno di Aruba. Ban gosa di nos carnaval di forma responsabel y sanamente. Ban cuida nos muchanan di sonido y solo pa asina nan tambe por gosa. Ban cuida nos mes pa cada un di nos celebra un carnaval sin ningun problema”, Prome Minister a finalisa bisando den su discurso di diadomingo mainta.
