Minister Xiomara Ruiz-Maduro a entrega Presupuesto 2018 na Parlamento diabierna ultimo. E presupuesto ta inclui un analisis critico door di Raad van Advies, e organo di consulta riba leynan di pais Aruba. Den nan evaluacion, ta critica e presupuesto, e aumento den gastonan t sigur e tumamento pisa di ambtenaar den apenas 100 dia di Gabinete Wever-Croes.
Raad van Advies den su critica riba e presupuesto 2018 ta conclui cu e presupuesto ta leu di cumpli cu e normanan ancra den ley. “Uitgaande van de bovenstaande cijfers en de verwachtingen, zal het financieringstekort voor de collectieve sector voor het jaar 2018 ruim onder het wettelijk gestelde financieringssurplus van 0.5% van het BBP uit te vallen, namelijk een tekort van 3.7% van het BBP.”
E organo ta conclui tambe cu, contrario na declaracionnan di Minister di Finanzas Xiomara Ruiz-Maduro, Gobierno ta aumenta e debe di Pais Aruba mas hopi cu e la aument’e aña pasa. Esaki apesar di e medidanan cu Gabinete Wever Croes tin plan di introduci, manera e aumento di BBO te cu 6%. E desaroyo di e debe di Pais Aruba lo subi di e forma aki di 85% na 2016 pa 86% na 2017 pa 88% e ana aki, segun Raad van Advies.
Notabel ta tambe cu e organo ta constata cu Gabinete Wever Croes a tuma 100 empleado den servicio di Gobierno den su prome 3 luna (100 dia) di Gobernacion. E organo ta compara e cantidad di ambtenaar den servicio di Gobierno di fin di ana 2017 cu e cantidad di ambtenaar den servicio di Gobierno na fin di februari 2018 pa yega na e conclusion aki. “De in de bijlage bij het ontwerp opgenomen personeelsstaat laat bovendien zien dat de bezetting per februari 2018 ten opzichte van ultimo 2017 is toegenomen met ruim 100; dit terwijl het voornemen van de regering juist is om de kosten van het personeel te beheersen.”
24ora.com no a logra verifica si e cantidad di 100 ambtenaar aki ta tene cuenta cu e mas di 100 persona cu Gabinete Wever Croes a retira for di servicio di Gobierno fin di januari. Si a caso ta asina, e cantidad di ambtenaar cu Gabinete Wever Croes a tuma den servicio lo ta mas cu 200 persona den nan prome 3 luna di gobernacion.
E critica di e organo riba e presupuesto ta basta extenso y ta inclui temanan manera e aspecto incidental di algun medida cu Gabinete Wever Croes ta introduci, e efecto di mas di 140 miyon florin pa aña cu e reduccion di edad di pensioen lo tin riba finanzas publico di Pais Aruba y e falta di specificacion duna riba diferente intencion di Gobierno.
Click AKI pa e conseho completo di Raad van Advies
