Betico Croes, ta un estadista Arubano cu te cu awe ainda ta inspira generacionnan. Henter e siman aki fraccion di MEP ta bishita scolnan y por mira e impacto cu e decision y pasonan tuma aña atras, tin awe ainda riba e studiantenan. Sin cu nan a conoce personalmente, hopi di nan ta transmiti un aprecio sin igual pa su persona y locual cu e a nifica pa Aruba. Awe ainda nan ta convivi e ideologia, cu el a planta den e comunidad aki. E ideologia di: ta sincero den bo intencion y no haci nada pa bo propio interes, asina Parlamentario Hendrik Tevreden a vocifera.
Betico Croes a practica liderasgo riba un nivel cu te cu awe ta di admira. Su lema; realisa cu bo ta traha pa pueblo, no pa interes personal. Un lema cu el a biba y practica cabalmente. E sinceridad cu e tawata transmiti, a logra capta e mente y curason di henter un pueblo pa para banda di dje den e lucha y causa mas grandi cu Aruba a conoce den su historia te cu awe, e Status Aparte.
Aruba a conoce diferente politico, di diferente partido. Pero ta parce cu Betico su mensahe no tawata mara na politica solamente, ni solamente un partido. Su mensahe a etala ariba un nivel mas halto, cu te cu awe Reino Hulandes ta bon na altura di e logro grandi di Betico. Aruba por ta orguyoso di por a produci un yiu cu a sa di carga su Pais ariba tur otro afan personal. Un lider cu den tur honestidad a splica den pleno campaña na su pueblo e seriedad y retonan su dilanti, apesar di core e risico di perde un eleccion. Un persona cu a pone tur atencion y esfuerso, pa por logra e bienestar pa su Patria.
Den e dianan nos dilanti celebrando dia di Betico, nos tin e speransa cu su corahe y balentia lo motiva y inspira nos den e trabou di tur dia nos dilanti, asina Hendrik Tevreden a termina bisando.
Nos tin e dificil tarea, pa mescos cu esnan cu despues di dje cu a percura di practica e ideologia aki, pa continua y aplica e ideologia di respeta, lucha y sacrifica pa logra progreso na Aruba su bienestar.
Temponan ta cambia, pero principionan ta permanece. Si nos pone interes di otronan prome cu nos mes, nos tambe lo ta contribuiendo grandemente cu e adelanto pa nos Pais manera Betico d.f.m. a hasie.
