Den e tres simannan cu a pasa nos a pone hopi enfasis riba e maneranan con un persona por yega na e nacionalidad Hulandes si acaso e no haya esaki van rechtswege. E dos alternativanan pa esaki ta obtene nacionalidad Hulandes mediante un optieverklaring y e otro posibilidad ta adkiri e nacionalidad Hulandes door di naturalisa. E diferencia entre e dos maneranan aki ta basta remarcabel. Nos ta menciona algun di nan. Pa di prome e procedura di optie tin un duracion hopi mas cortico compara cu esun di naturalisacion. Na di dos lugar e persona su circumstancianan specifico mester califica cu un di e situacionnan describi den art. 6 Rijkswet op het Nederlanderschap pa por adkiri e nacionalidad Hulandes. Un tercer punto ta cu ora di haci e procedura di un optieverklaring e persona no mester haci ningun examen, sino solamente haci un declaracion. Pa naturalisa tin e exigencia cu mester haci examen di Hulandes y Papiamento. Hopi biaha esaki ta forma un barrera pa e persona cu nacionalidad stranhero adkiri e nacionalidad Hulandes, pero esakinan ta stipula door di e ley di reino kiermeen no tin excepcion.
Den e edicion aki nos lo elabora riba specificamente e posibilidadnan pa e pareha di un Hulandes cu tin un nacionalidad stranhero adkiri e nacionalidad Hulandes. E persona aki tin dos posibilidad pa adkiri e nacionalidad di su pareha cu ta Hulandes. E promer ta pa medio di un optieverklaring conforme
art. 6 inciso 1 sub g RWN. E di dos posibilidad ta adkiri nacionalidad door di naturalisa conforme
art. 7 RWN y cumpliendo cu e rekisitonan di art. 8 RWN. Den e siguiente dos paragrafnan nos lo splica un poco mas tocante e dos posibilidadnan aki.
Adkiri nacionalidad Hulandes conforme art. 6 inciso 1 sub g RWN
Art. 6 inciso 1 sub G RWN ta stipula e siguiente condicionan:
- E persona cu nacionalidad stranhero mester tin por lo menos 15 aña consecutivo (sin interupcion) bibando na Aruba cu status legal y;
- E persona mester tin por lo menos 3 aña casa cu un persona cu nacionalidad Hulandes.
Si bo persona ta cumpli cu e rekisitonan menciona, bo por tuma contacto cu Gabinete di Gobernador pa inicia bo proceso di opcion. Na Gabinete tin cu yena e formulario di optieverklaring. Alabes ta entrega esaki conhuntamente cu otro documentonan relevante.
Documentonan cu mester wordo entrega na Gabinete di Gobernador ta:
- Paspoort valido di bo persona y di bo pareha;
- Permisonan di estadia di e persona cu nacionalidad stranhero;
- Acta di nacimento (original) di bo persona y di bo pareha;
- Acta di matrimonio (original);
- Prueba cu e pareha di nacionalidad stranhero tin por lo menos 3 aña (sin interupcion) bibando hunto cu su pareha di nacionalidad Hulandes (na e mesun adres).
Ta importante pa remarca cu tur acta cu no ta na Hulandes mester wordo traduci na Hulandes. Esaki ta e responsabilidad di esun cu ta hacienda e peticion. Gobernador lo informa por escrito na e persona si su peticion a wordo honra of nenga basa riba e informacion cu e persona a suministra. Pa ricibi un contesta riba e peticion mester tene cuenta cu un periodo di 3 luna. Si e persona cu a haci e optieverklaring ta cumpli cu tur rekisito menciona, gobernador lo confirma e peticion. Si tur cos ta na ordo e persona lo wordo invita pa un ceremonia formal den cual e lo mester hasi un declaracion di e laso cu e tin cu e comunidad Hulandes. Despues di e formalidad aki e persona oficialmente a adkiri e nacionalidad Hulandes.
Adkiri nacionalidad Hulandes door di naturalisa conforme art. 7 juncto art. 8 RWN
E procedura di naturalisacion ta uno mas riguroso y ta tuma un caminda mas largo. Pa ricibi un contesta riba e peticion mester tene cuenta cu un periodo di 1 aña. E condicionan pa por naturalisa ta entre otro:
- Bo ta casa cu un persona masculino of femenino di nacionalidad Hulandes of ta un pareha registra (geregistreerd partnerschap) cu un persona masculino of femenino cu tin e nacionalidad Hulandes y tin por lo menos 3 aña casa y ta bibando como pareha registra. Tambe e solicitante cu ta bibando 3 aña hunto cu su pareha Hulandes y sin interupcion a base di un acuerdo legal (samenlevingsovereenkomst) por entrega un peticion di naturalisacion;
- E persona cu nacionalidad stranhero mester wordo considera di ta estableci na Aruba door di e hecho cu e solicitante tin algun tipo di nivel di conocemento di e idioma Hulandes y Papiamento (papia, lesa, scirbi y compronde), pero tambe tin algun conocemento di e sociedad di Aruba. Bo conocemento di e idiomanan y sociedad lo wordo comproba a traves di un prueba.
E prueba di naturalisacion pa Aruba ta consisti di 1 componente di conocimento di nos comunidad y structura estatal, 4 componente di idioma Papiamento y 4 componente di idioma Hulandes. Inscripcion pa e prueba di naturalisacion lo habri na luna di augustus 2020. E fechanan di inscripcion y tambe e fechanan riba cual e pruebanan lo tuma luga, lo keda publica riba e website di ea.aw y den medionan di comunicacion.
Importante pa remarca ta si acaso bo persona tin un diploma of certificado Hulandes di un scol mas halto cu nivel basico y e lesnan tabata na Hulandes, bo persona no tin e obligacion di haci e prueba aki.
Pa un lista completo di e rekisitonan di naturalisacion nos ta invita bo persona pa lesa nos articulo anterior di naturalisacion.
Tienda di Ley kier enfatisa cu a trata mas tanto posibel na splica e articulonan aki den Papiamento pero no tur biaha tin palabranan huridico exacto cu por wordo usa. E meta principal di nos articulonan ta pa informa e comunidad den liñanan grandi tocante e topicoen cuestion. Ta spera cu por a informa e lector un poco tocante e scenario specific aki. Si abo tin un pregunta specifico relaciona cu adkiri nacionalidad Hulandes mediante un optieverklaring of door di naturalisa nos ta invitabo pa haci bo preguntanan via: [email protected] of nos fb page. Nos ta gradici e comunidad pa e confiansa y e feedback ricibi pa medio di e preguntanan cu nos a ricibi via email y kier notifica cu nos ta tratando di atende mas persona cu ta posibel digitalmente.
Scirbi pa studiantenan di Ley: Minorca Martis LL.B. , Gerick Croes LL.B. , B.ec.
