Tabata net rond di 12:00am cu a sosode un accidente serio riba J. Yrausquin Boulevard na e cura di Divi Links despues di Alhambra Casino. Un hoben a resulta seriamente herida den e accidente, den cual un solo auto ta envolvi. Testigonan na e sitio a sigura cu tabatin pustamento y cu e Supra a perde control drenta cura di e Golf Course.
Ta trata aki di un auto marca Toyota modelo Supra color blanco, numera A-3899. Den dje tabatin e chauffeur y un pasahero. Ambos bisti na shirt color cora. Despues di e impacto, como cu e auto a bolter, esun a carga e otro saca for di e auto y pone drumi riba caminda. Cua tabata chauffeur y cua ta pasahero no ta mucho bon conoci. E victima su amigonan tabata grit’e bou e nomber “Santi”.
Por lo menos un amigo a conta nos na e sitio cu el a caba di topa e duo den e auto na altura di rotonde di Sasakiweg. Esaki ta cuadra pasobra algun minuut prome Polis a core cu tur hende for di Eagle Beach, unda tabatin aglomeracion di auto y hende disfrutando di nan diadomingo anochi.
Ta sospecha cu nan lo tabata bin riba Dr. Horacio Oduber Boulevard dilanti Hospital y na e rotonde di Alhambra a subi Juancho Yrausquin Boulevard direccion Oranjestad. Pero den un pida masha cortico a alcansa “top speed” cu nan auto uzando Turbo y lo a perde control, baha caminda, rabca henter un palo di luz y despues bolter drenta e cura di Divi Links.
Como cu e auto tabata hole gasolin, e amigo a spanta y den su ansha a carga su amigo herida, y sak’e for di auto. Testigonan na e sitio tabata grit’e pa no mishi cu e victima pasobra e pot haci’e daño. Asina mes e no a give-up y a sigui carga e amigo te cu el a pone drumi riba asfalt pa warda Ambulance busk’e pa brind’e cuido. Na e sitio e victima tabata grita di dolor, ta sospecha cu e lo por a kibra un pia.
Polisnan a cera e caminda na ambos banda di caminda pa por investiga con e desgracia aki a sosode. Mester bisa cu decenas di auto y hende a yega mesora na e sitio y percura pa un aglomeracion pisa rond di e victima. Polisnan tabatin poco dolor di cabes pa por a haya cooperacion di mirones pa mantene distancia.
