Maestronan no tabata kier pa Minister di Enseñansa ricibi e Manifiesto, ya cu nan no tin confiansa den dje mas. Esaki ta e motibo cu Prome Minister Wever Croes, kende a compaña su colega y dal un stap dilanti pa atende cu e maestronan.

E profesionalnan a acudi diabierna atardi na sede di Gobierno pa entrega un Manifiesto expresando nan preocupacion. Un di nan ta Zuleika Wever, kende a bisa cu prome cu vakantie a entrega Minister un carta di preocupacion y no a haya contesta.

A tuma nota cu Parlamento a pidi e mandatario pa sinta na mesa cu e docentenan ora cu scol cuminsa. Esey no a sosode, y na su luga a constata diferente cambio a wordo haci den enseñansa sin consulta ningun momento cu e gremio. Esnan cu a haya problema tabata na OAA, SPO, Middag MAVO, Kleuter Onderwijs, Basis Onderwijs; Traimerdia; MDC; etc.  Hopi cos a sosode den e diferente seccionnan aki. Tur esey ta demostra cu nan preocupacionnan no a wordo scucha. “No a honra e ordo di Parlamento,” el a bisa.

“Nos no ta bay entrega nada na Minister Lampe. Nos ta pidi pa esun cu ta encarga cu Gobierno atende nos,” Wever a agrega. Y esey a sosode tambe despues cu e docentenan a cuminsa grita “Prome Minister, Prome Minister.” Lampe tabata e prome pa sali pafo pero no a entregue sino a duna esaki na Prome Minister.

E mandatario a splica cu nan lo invita e maestronan pa sinta na mesa pero den un delegacion hopi mas chikito. “E ta hopi doloroso cu e maestronan mester subi caya. E situacion financiero cu nos a haya Aruba aden tabata hopi malo. Placa a wordo derecho sin cu a pone ni un cen drechi pa enseñansa ta haci hopi dolor.

Mare nos a hereda otro situacion, nos a spaar enseñansa como prome … lamentablemente e situacion financiero t’asina malo cu nos no por spaar enseñansa. No tin ningun manera facil pa sali di e situacion financiero malo. ” Pero el a bisa di tin e compromiso pa drecha e situacion financiero y percura cu enseñansa ta haya un inversion mas halto.

Na final el a bisa cu ta luchando pa traha un otro escenario pa por yega na yuda enseñansa. E contesta cu e maestronan a duna cu aki no ta trata solamente di e situacion financiero, pero  ta e falta di respet di e Minister di Enseñansa actual cu ta sintiendo.

Comments

comments