Miembro di Parlamento pa Fraccion di POR, Alan Howell a splica cu durante e reunion publico di diaranson ultimo riba e tema Coronavirus, el a haci varios pregunta na Minister di Salubridad Publico, Dangui Oduber. Algun di e preguntanan aki ta referi na e tema di awa mes, manera con ta bay haci cu esunnan cu no tin awa na nan cas. Tambe si Gobierno ta bay pidi WEB pa ta mas flexibel den e tempo aki cu cortamento di meter di awa.
Parlamentario Alan Howell a comenta cu ta importante pa den e temponan aki, awo cu Coronavirus a yega nos isla, pa WEB ta mas flexibel cu pago y cortamento di awa. E ta bisa cu “si laba man ta e yabi pa evita Coronavirus segun expertonan rond mundo, e ora ey mi ta desea pa WEB ta mas flexibel cu pago y cortamento di meter di awa”.
Parlamentario di POR ta spera di por mira un solucion pronto pa cu esaki y por scucha kico Prome Minister, cu ta encarga cu WEB, ta bay bisa riba e tema aki, pasobra preveni ta miho cu cura.
