Bao di ritmo di Asambeho y tambe cu un caravana basta grandi, partido POR a yega trouwraad. Riba lista di e partido aki, tin figuranan hopi conoci, cual ta e lider Otmar Oduber, Andin Bikker y tambe Marisol Lopez-Tromp. Segun Oduber, diaranson e candidatonan a firma un protocol caminda cu nan lo pone nan posicion disponibel, dependiendo ken ta saca mas voto pa nan drenta Parlamento, sino esnan cu tin mas voto lo bay.
Oduber a referi cu no tabata dificil por completo forma nan lista.
Otro caranan cu ta profila den POR ta Alan Howell, kende tabata forma parti anteriormente riba lista di AVP, y por a mira caranan nobo, pero no desconoci, como Joselin Croes, kende den pasado tabata forma parti di e lista di OLA, Jacky van Putten, un persona no desconoci den mundo di Deporte, Edjean Semeleer, conocido cantante y entrepeneur den comunidad, Robin Ann Didier, kende tabata forma parti di mundo sindical y tambe Gregory Milliard y Ronny Maduro, kende ta un cara conoci den prensa. Pa Oduber, esaki ta un momento grandi pasobra ta prome biaha su partido ta bay eleccion.
