POR: A cuminsa e “bid walk” pa maneho di desperdicio

Diabierna miembronan di Fraccion di POR den Parlamento, esta Marisol Lopez-Tromp y Alan Howell a presencia inicio di e sesion informativo di e “bid walk” pa cu proceso di RFP. Riba invitacion di Minister Otmar Oduber a scucha presentacionnan riba e tema importante di maneho di desperdicio. Un tema di importante no solamente pa medio ambiental di nos isla, pero tambe pa salubridad y desaroyo general di ciudadanonan.

Marisol Lopez-Tromp despues di e presentacionnan a indica cu e tema di dump ta bay basta aña atras unda cu semper tabatin e intencion di elimine y bin cu alternativanan. E sesion informativo a mustra na un forma hopi transparente e proceso cu ta canando, unda expertonan a presenta e procedura na un sala yen pa di e forma aki e diferente actornan den e parti di maneho di desperdicio por a haya diferente informacion riba e topico aki. Algun punto a toca e parti labor, incluyendo derecho di e trahadornan. Tambe e parti di tereno, es decir, unda e ta bay ta ubica, kico ta e reglanan y tambe e parti tecnico y e proceduranan cu nan ta realisando na e momentonan aki.

Comision permanente di Infrastructura den Parlamento lo keda monitorea e proceso aki di cerca pa keda mantene Parlamento na altura di su desaroyo.

Comments

comments