For di 1989 Popcorn Club y Popcorn Dancers ta brinda mucha y hubentud un variedad di actividad sano. Fundado y director di dicho club, Freddy Tromp, a conta nos cu Popcorn Club ta e cuna principal di Popcorn Dancers. Meta principal di e organisacion ta formacion di hoben y ta purba di haci esaki pa medio di organisa diferente evento educativo, cultural, social y un di nan ta baile.
Diaranson tabata e prome les despues di tur loke por a pasa den e pandemia. Ta cuminsando bek full trot. A cuminsa cu full un structura nobo, di cual ta bay keda mantene. Tur loke tabata bin ta haciendo den Popcorn, pa loke ta baile, diaranson y diabierna, tin les di klasnan social, di 5 pa 7 tin pa mucha y di 7 pa 9 tin pa e hobennan.
E lesnan aki ta gratis, segun Tromp. Adicionalmente loke a cuminsa cu ne, ta for di dialuna pa diasabra, lo tin diferente les cu ta bay duna pa un contribucion hopi chikito. Esey ta pa yuda e organisacion sigui loke ta recauda cu e lesnan aki, cu lo bay bek den e club, pa asina sigui organisa tur loke tabata haci prome.
Na cuminsamento, tur loke ta haci den Popcorn Club, tabata draai cu loke ta gana cu nan presentacionnan na e diferente hotelnan tabata presenta. Pero desde maart nan no ta bailando mas. No tabata tin ningun tipo di entrada y tabata dificil pa sigui haci loke nan tabata haci.
Ta cuminsa cu un star ensemble y den esey ta dunando diferente les. A cuminsa cu eseynan caba, cual ta bayendo hopi bon, cual ta lesnan cu ta di Afro. Ta duna Hip Hop open style. Tin salsa casino level 1, 2 y 3. Tin tambe les di body control. Tin tambe popcorn therapy, cual ta un combinacion den e les aki unda cu ta haya fitness, hunto cu self defense. Tur cos ta bay riba ritmo di baile, mirando cu ta forma parti di popcorn.
Tambe tin lesnan di ballroom. Den e les aki ta haya 10 diferente estilo di baile di ballroom. Tambe tin les di magia. Ta haya tur e basiconan. Despues ta bay intermedio y avansa. Tambe tin les di breakdance. Pa e les di breakdance, diaranson tabata tin e prome instructor internacional cu a bin pa dos luna. Ora cu e bay tin un otro instructor cu ta bin pa dos luna.
Cada dos luna lo tin un otro instructor pa reemplasa pa e lesnan di breakdance. A busk’e asina, pasobra den Popcorn no tin un Bboy cu ta capacita pa por duna e les. Den e pandemia a busca diferente proyecto pa haci pa e grupo y esaki ta facilita pa un organisacion “Tur Cos ta posibel”, cual Tromp tambe ta forma parti di dje.
Intercambio hubenil
Hunto cu esey ta bin adicional, na maart, un grupo di popcorn cu ta bayendo Inglatera pa haci un Youth Exchange cu hobennan di e pais aki y Cyprus. Nan lo ta biniendo bek dia 3 pa 10 di april. Aki e hobennan aki tambe lo tey na Aruba pa e intercambio.
Despues di esey lo tin otro actividadnan cu diferente otro pais cu ta formando parti di e organisacion cu ta bezig cu ne. E ta bay ta hopi interesante, mirando cu e generacion nobo awor aki den Popcorn lo ta experenciando cosnan diferente di loke a yega di haci den pasado.
Tromp ta duna un bon bini na tur hoben cu kier uni na e organisacion. Riba diaranson y diasabra ta gratis y si a gusta e lesnan aki, por join facilmente e otro lesnan pa sigui desaroya bo talento.
Contacto
Pa tuma contacto cu Freddy por yama 5670088 y tambe por subi riba nan pagina di Facebook of via Instagram, caminda tambe por haya mas informacion di e diferente lesnan cu ta duna.
Tambe por mira e dia y oranan cu e lesnan ta disponibel, cual ta Popcorn Aruba.
Popcorn Club ta duna nan lesnan na Centro di Bario Dakota. Nan ta trahando hopi duro y si ta bon pa e aña aki lo ta drentando nan propio edificio, cual ta canando hopi bon. Sinembargo lo mantene nan sede na Dakota. Idea ta pa nan ta na Playa, Dakota y San Nicolas.
