Tabata diasabra den cared’i 4:00 pm, ora cu polis a activa mesora pa atende un caso serio di menasa cu un arma di candela. Patruyanan a yega na e sitio uzando e protocol di cautela, ora cu nan ta na altura cu e sospechoso por ta arma. Na un forma tactico, e defensornan di ley, a yega di sorpresa riba un hoben cu taata canando den Pindastraat na Dakota.
E polisnan a mand’e tera mesora pa no dun’e chens mes pa reacciona of pa hinca man den saco, ni nada. A deten’e na e sitio bou sospecho cu el a caba di menasa un otro persona cu un arma di candela. Ki tipo di arma, si ta pistool of revolver, no ta conoci ainda y lo forma parti di e interogacion y investigacion.
Despues di su detencion, polis a transporta e sospechoso pa ward’i polis pa present’e dilanti un sub-fiscal, cu mester bis’e su derechonan y interog’e pa por dicidi si e ta keda encarcela pa mas investigacion of si e por bay cas despues. Tur cos ta depende cu si a hay’e cu e arma di candela of no.
Echo ta cu ultimo dianan ta a base diario ta sea gara sospechosonan cu arma di candela of ta tuma luga un caso di tiramento. E ta demostra e realidad di cuanto arma ta circulando keto bay den comunidad. Polis y Ministerio Publico a start un campaña pa entrega arma, tanto di candela, arma blanco of municion, sin persecucion…cu lo continua pa algun dia mas. Masha poco hende a duna oido na e yamada y e oportunidad. Pero, pa cada dia cu famia y conocinan, cu sa cu nan ser keri tin un arma, keda keto y tapa pa nan…ta mas caso di asesinato ta tuma luga riba nos isla y uzo di arma ta sigui bay for di man. Tur esaki pasobra nos ta opta pa keda keto y no bisa nada, te dia e portado di arma uz’e riba un otro of riba su mes, lagando tur famia y conoci den tristesa atras!
