Ayeranochi, despues di e atraco na Savaneta, mesora Recherchenan a haya aprobacion di Fiscal di Ministerio Publico pa detene dos sospechoso. Husticia ta sigura di tin motibo pa sospecha riba dos mucha homber y un mucha muhe, cu nan mes ta envolvi den e ultimo 6 casonan di atraco arma riba supermercadonan y Mini Market Chines, specialmente pariba di brug. Te ainda e dos sospechosonan principal ta sigui fugitivo.
Awe marduga, Polisnan, riba ordo di Ministerio Publico y uzando e team di aresto, a bishita dos cas. Probablemente no tabatin un bon “voor onderzoek” haci pasobra Polisnan a yega e casnan y “dal den bashi”, pasobra no a logra topa cu e dos mucha hombernan envolvi. Si a logra topa un mucha muhe cu tambe ta di interes den e caso. Tambe a bay cu un auto, cu ta sospecha cu lo a uza despues di e atraconan pa por huy. Na e casnan a haya material di cual ta sospecha cu a uza tambe durante e atraconan.
A haci entrada hudicial na un cas na Caya Bonaire na San Nicolas y e otro cas na Pos Chikito # 247-K. Despues cu na ambos cas no por a haya e sospechosonan, a bay na Caya Saba unda si a detene un mucha muhe.
Polis a sigura di lo sigui haci tur esfuerzo pa logra detene ambos sospechoso, cu ta causando panico den comunidad y ta atacando establecimientonan comercial cu arma den man, pa logra horta placa y producto. Ambos sospechoso ta conoci di husticia y lo no dura mucho pa gara nan. Polis a informa nan mayornan na cas cu ta miho pa nan mes entrega nan mes na e Warda di Polis di mas cerca, pa evita mas problema.
