Despues cu Minister Presidente mr. Evelyn Wever-Croes a anuncia diaranson cu riba diahuebs manece diabierna marduga tin Toque de Queda, parce cu a bin cambio. E anuncio a dura net un solo dia. No ta conoci si no a regla e procedura legal bon, pasobra awe Cuerpo Policial a instrui Polisnan cu no mester actua mas, no detene ningun hende mas.
Cuerpo Policial a confirma cu e instruccion interno a bay na tur Polis awe, sin kier bisa e motibo. Ningun hende kier aclaria ken a pega e barco aki, sea ta Polis, Ministerio Publico of Gobierno. Hecho ta cu un di e tres instancianan a tuma un decision y actua riba dje prome cu un ke otro ta legalisa y tin base legal pa actua.
Awe marduga Polis a detene 8 persona, di cual 5 tabata na Parlamento den e protesta di Richie Danies. Normalmente cada detenido ta haya un multa di mil florin minimo. Ministerio Publico awe no kier a bisa si esey ta aplicabel awe, ni tampoco cuanto e suma total tabata ayera di multa.
Ta parce cu e forma con Gobierno y Crisisteam ta manehando e efectonan di Coronavirus na Aruba ta sali di un blunder pa e otro. Sino ta lekmento di informacion confidencial-medico di pashentnan, awo a anuncia Toque de Queda diaranson y bira cancel’e diabierna. Nos ta manehando e crisis aki den serio?!
