Mientras cu e emocionnan ta subiendo, debi na e ultimo desaroyonan y e opinionnan pisa di gobierno contra polis, tur wowo awo ta dirigi riba ex-altoinspector Alvin Molina. E ultimo a dicidi cu na aña 2021 e ta drenta den politica y a join partido MEP. Esey despues di a “shop” na varios otro partido pa check cua ta dun’e e miho oferta. Polisnan a sosten’e y el a bira parlamentario. Pero, awo cu gobierno ta ataca polis, el a bira e enfoke pasobra su decision awor lo dicidi riba para band’i su votadonan of keda den gobierno pero sin sosten di voto.
E ultimo declaracion di Minister Rocco Tjon tabata e ultimo druppel pa pasa e hemchi. Polisnan no por caba di compronde con un homber cu a traha den e edificio, conoce e retonan, sa masha bon kico ta pasa eyden, sa di coleganan malo y cu a fayece, awo ta sali bisa cu no tin schimmel den e luga y hasta cherche di e sindicalistanan. Despues di entrega tur confiansa cu por tabatin den e minister, awor e enfoke ta riba e parlamentario, ex-polis Alvin Molina.
E ultimo aki tin un relacion difierente. E tabata “district chef” di Oranjestad prome cu el a asumi e funcion di miembro di parlamento pa fraccion di MEP na aña 2021. E mas cu tur hende conoce e retonan y e dificiencianan di e edificio cu ta pertenece na FCCA pero cu ta huur cu Cuerpo Policial Aruba. E luga ta sea mal traha of mal maneha door di FCCA mes, cu no ta manten’e y percura pa bon sistema di airco y maneho di aire eyden. Ta crea “schimmel” den e luga cu ta pone cu varios polis awendia ta sufri di cancer ma garganta. Ta bon pa menciona si, esaki no ta un problema di awe so, sino di hopi aña caba, pues tambe di otro gobiernonan di otro asignatura! Pero pa bay den pasado awo no lo yuda cura esunnan cu cancer awe y esunnan cu ta malo ainda.
Polisnan ta mandando mensahe tras di mensahe pa Molina mientras cu tabatin varios cu a yam’e y papia cu ne y garantis’e cu si e tuma un posicion robes mañan, cu esey lo cost’e su carera politico. Parce cu varios di su sostenedonan, procedente di Cuerpo Policial Aruba, a lag’e sa cu awo e tin dos opcion: Para cu nos of para contra nos. Cu e realidad ey riba mesa, Alvin Molina por dicidi pa demostra sosten door di bira independiente den gobierno y sigui sostene gobierno, pero sinta na e otro banda di sala di parlamento. Of e por keda cu nan y perde e sosten cu el a haya den su prome eleccion, apenas un aña pasa.
Entretanto Alvin Molina a saca un relato di prensa den cual, basicamente, e ta demostra di no ta comparti e mesun opinion cu Rocco Tjon, cu a laga sa cu no tin schimmel den e edificio. Mester menciona cu na mas di un ocacion caba, Molina a para contra e fraccion di MEP, demostrando cu e por para su so ora mester. Pues lo no ta prome biaha cu e ta tuma un posicion contra MEP. El a hacie pa San Nicolas algun bez caba!
Tocante Alvin Molina
Alvin Molina ta naci na Aruba y tin 47 aña di edad. El a studia na Colegio Arubano VWO, a sigui pa su estudio na Nederlandse Politie Academie na Appeldoorn y a regresa Aruba pa bira inspector di polis. Entretanto el a cumpli 20 aña como polis, semper den un posicion di maneho y strategia. Awor el a drenta arena politico y ta cla pa sirbi su pueblo atrobe, pero e biaha aki como parlamentario.
Den su prome salida, Alvin Molina a haya # 10 riba e lista di partido MEP. A participa den eleccion na juni 2021 y a logra no menos di 257 voto riba su nomber. Durante su campaña electoral, a dedica hopi atencion for di unda e mes ta bin, esta San Nicolas. Cu salida di Chris Romero for di lista, a bin espacio pa un politico nobo cu e conviccion pa trece cambio y di ta un bos pa e barionan pariba di brug.
E semper a gusta e idea di sirbi su comunidad. El a hacie como polis y ora cu a resta tempo, el a hasta funda Kiwanis Club of San Nicolas, cu el a presidi te cu algun tempo pasa y cu awendia ainda ta un miembro activo.
E echo cu Gabinete Wever-Croes a combina husticia y asuntonan social, ta haci e trabou poco mas facil p’e. Pasobra e ta domina ambos materia manera den su plant’i man y lo sa di tin un bista skerpi riba ambos maneho. Molina ta sinti cu mas tanto logra den arena social, menos trabou lo tin pa husticia.
Tocante Cuerpo Policial Aruba
Cuerpo Policial Aruba ta existi desde aña 1986 y ta conta awendia cu mas o menos 600 Polis trahando incansablemente pa brinda siguridad na nos pueblo. Ta trata aki di mas o menos 375 hende homber, 104 hende muhe y 120 empleado administrativo, trahando den 4 districto, cu Warda nan di Polis situa na Oranjestad, San Nicolas, Noord y Santa Cruz.
Orguyosamente Cuerpo Policial Aruba ta conta cu hopi respet internacional, specialmente pa su unidadnan special manera “Motor Unit”, “K9 Unit”, “Rapid Response Team”, “Arrestatie Team”, “Mobiele Eenheid” y “Duik Team”, sin lubida e departamentonan conoci di patruya y recherche cu ta bon entrena y capaz pa investiga y soluciona e casonan mas complica. E Cuerpo di Polis awendia ta bou maneho di Alto Comisario Ramon Arnhem.
Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP.
