Lesa buki ta dushi. E siman di buki a yega su fin y diferente scol a tene nan actividad caminda cada un a organis’e di nan mesun forma.
Scol Caiquetio den un forma original a pensa riba e tema “Ban Keiro” caminda por haci uzo di diferente manera pa keiro riba nos Isla. Algun di e formanan ta den auto, na pia, den boto of den avion.
Pa e dia di clausura a focus riba dos metodo di keiro cu ta riba tera cu riba lama. Un invitacion cordial a bay na Cuerpo Policial muy particularmente na e departamento di agentenan motorisa y e departamento maritimo.
Gustosamente nan a acepta y a presenta pa duna e muchanan un splicacion riba e parti di siguridad den trafico ora di keiro cu mami, papi y/o famia.
E alumnonan a haya un splicacion amplio kico e trabou di polis motorisa ta haci riba tera y tambe esnan encarga cu e trabou riba lama. A duna un demostracion di wave runners como tambe e brommernan cu ta uza durante nan ora di trabou diariamente.
Agentenan presente tambe a duna un presentacion / instruccionnan na momento di crusa caya como tambe e peligernan cu ta bin cun’e si no paga tino y no cumpli cu e reglanan di trafico.
E alumnonan a haci diferente pregunta y a keda impresiona cu tur informacion pero mas cu tur cos a pasa un rato super emocionante ora por a yega cerca / scucha sirena / mira nan docente deteni cu boei na man / y siña crusa caya. Un danki grandi a bay na Cuerpo Policial pa semper ta disponibel pa e comunidad, pero muy special pa e bishita y na e agentenan di Cuerpo Policial Aruba cu a presenta.
