Cuerpo Policial kier ta mas cerca di comunidad. Polis di Bario na San Nicolas a organisa un reunion di contacto na Centro di Bario Lago Heights cu e habitantenan dje bario. Aki e habitantenan a vocifera diferente punto n’e polisnan di bario.
Ramon Arnhem, altocomisario, tambe tabata presente pa asina cera conoci cu e comunidad di San Nicolas. E ta haya cu e encuentro aki tabata uno bunita y valioso. Loke nan tabata kier, ta pa tin combersacion mas di cerca cu e sociedad. Na e miho manera pa haci esey ta door di bay den combersacion, door di tene dialogo.
E altocomisario a indica pa loke ta trata e dialogo ta pa scucha bon, di scucha kico hende tin di bisa nan riba problema pero tambe haci pregunta. Arnhem a expresa di ta haya e iniciativa aki uno fantastico dje comisario van Hassell. Ta importante y nan kier pa ta e tipo di polis cu ta cerca dje sociedad. Pa haci nan trabou bon, ta importante pa scucha dje hendenan kico ta e problemanan.
