Un rato pasa pa mas of menos 10:00pm a spacha un patruya di Santa Cruz pa un cas situa na Sero Pita. Ey a topa cu un hende homber agresivo cu tabata kibrando tur cos den cas. E prome unidad a pidi pa refuerso mesora, pero e homber a lanta cu nan, pa cual e polisnan a saca nan arma reglamentario y a tira e homber mata!
Polis a pidi pa ambulance yega mesora na e sitio, pero e paramediconan no por a haci nada mas. Consecuentemente pa 11:10pm, Dokter Texier a constata morto di e homber di inicialnan W.P.B., naci na Colombia di 48 aña di edad.
Manera protocol ta indica, ora un polis uza su pistool, mesora Landsrecherche mester presenta na e sitio pa investiga si tabatin uzo excesivo di poder of si e actuacion ta corecto. Ta opta pa un otro instancia “toets” e actuacion di polis. Hecho ta cu polis ta carga arma pa defende su mes tambe contra un atake di un otro persona. Landsrecherche awor lo mester saca afo si dos polis no por a logra domina un homber y cu ta hustifica e uzo di un pistool y cu un tiro dirigi.
Di otro banda, den pasado polis a bira victima di un agresion fatal riba dia 3 di juli 2017 na Boegoeroei, den cual un agente policial Tino Ruiz y e ciudadano Ericho Jimmy Tjong Kon Sang a fayece. E incidente mortal a wordo investiga door di Landsrecherche. Fiscal di husticia a pone e famia di e fayecidonan na altura di e conclusionnan di e investigacion, indicando cu e otro polis a actua corecto di tira e sospechoso mata.
