Un señora di 79 aña di edad, cu tabata goza di un bon salud a contagia cu Covid-19. E ultimo dos lunanan e tabata interna den e unidad di cuido intensivo na mashin di hala rosea. Aunke e no tabatin ningun complicacion prome, e virus aki tabata mas fuerte cu su curpa y no a logra sobrepasa e retonan cu a bin cu ne. Awe nochi el a fayece den ICU na Hospital.
Mester menciona cu ultimo dianan e cantidad di pashentnan den ICU a sigui subi y awe tabata na 13. E problema ta cu asina un pashent bay na mashin pa yud’e hala rosea, generalmente ta dura como 3 siman prome cu e por recupera y kita for di mashin pa su pulmon mes tuma e trabou over.
Awor aki mes tin un pashent di apenas 40 aña di edad cu ta luchando pisa cu su bida den e unidad di cuido intensivo, pa cual e Specialistanan y nursenan ta haciendo tur lo posibel pa brinda e cuido necesario pa yuda e pashent, via aparatonan sofestica y remedinan special, pa su curpa por sobrebibi e efectonan di Covid-19.
