Minister Andin Bikker no ta compronde cu hendenan cu ta bini na remarca pa hasta solicita pa e funcion di altocomisario, cu tin un educacion adecuado, cu ta integro, cu e experiencia y e boluntad pa sirbi nos pais den e tipo di posicion aki, ta masha limita na Aruba, asina Parlamentario Robert Candelaria a reacciona riba e pregunta di kico ta su comentario riba nombracionnan den top di polis.
E ex-altoinspector di polis ta opina cu na luga di cuida e hendenan aki y scoge nan segun un procedura transparente cu lo mester proteha nan den futuro di cualkier cuestionamento den nan trabou, minister ta tuma un desicion cu ta haci e mesun candidatonan hopi vulnerabel innecesariamente.
Ministerio di Husticia di un pais mester wordo caracterisa como un ministerio cu ta mantene su mes y otronan na tur ley y procedura. Siman pasa a bira conoci cu minister a nombra un korpschef nobo den persona di Vanessa Tjon-Kock.
E nombracion aki, mescos cu tur otro den e tipo di funcion di alto funcionarionan den husticia, mester bay segun procedura corecto, mirando cu e personanan aki mester carga nos departamentonan hudicial irespecto cua gobierno ta na mando y ken ta minister of parlamentario.
E funcionarionan aki tin cu carga responsabilidad grandi y tuma desicionnan dificil cu por tin consecuencia grandi den nos comunidad. Pues pa scoge y nombra un altocomisario, mester tuma tur medida necesario pa e desicion final wordo carga door di tur. “Nos ta lamenta cu atrobe minister no a haci esaki”, asina Parlamentario Robert Candelaria di partido AVP a duna di conoce.
Tempo minister Bikker a nombra e penultimo korpschef, el a opta pa no tuma nos sugerencia y tambe di D.R.H pa e altocomisario nobo wordo “ingewerkt” door di e korpschef saliente. E tempo ey a tarda pa yega na un altocomisario nobo. Awo nos ta mira e otro extremo, pasobra esun cu minister a tuma tanto tempo pa nombra, Bikker mes a dicidi rapidamente pa kit’e bek y laga e posicion vacante. E tempo ey a kita Hoo di e funcion sin pensa kico lo pasa cu ne y con lo reemplas’e.
Tres aña, tres altocomisario
Ta remarcabel cu den tres aña cu e Minister di Husticia ta na mando, ya nos ta bay pa e di 3 altocomisario. Esaki no ta un record pa ta orguyoso riba dje. E prome tabata Dolfi Richardson cu awo ta hefe di NCTVI. Despues a nombra Andrew Hoo cu awo ta wordo encarga cu un tarea nobo cu nos no por compronde e logica tras di e funcion nobo aki. Por ultimo ta nombra Vanessa Tjon-Kock pa encabesa Cuerpo Policial.
Mester evalua gasto nobo den tempo di crisis
Mientras hopi empleado publico ta preocupa si tin placa pa paga nan salario fin di e siguiente luna, minister Bikker ta sigui nombra hende y move hende cu salarionan di mas halto den gobierno. Ta conoci cu for di algun luna caba cu Gobierno a reduci salario di empleadonan publico debi na e crisis financiero cu e pandemia a trece cu ne. Den gangnan ta tende cu Hulanda lo kier corta mas ainda den e aparato gubernamental.
Minister Bikker ta pasa Andrew Hoo di altocomisario pa security guard
Minister Bikker no a stop aki cu e nombracion, pero el a sigui pa encarga Andrew Hoo cu e tarea di security guard di RDA, na un refineria cu ta cera. “Un altocomisario studia na Hulanda y na Merca ganando e salario maximo den gobierno pa bay cuida algun tanki bashi riba tereno di refineria ta prudente?”, ta locual Robert Candelaria ta puntra su mes. Ki sentido tin pa lanta henter un departamento nobo pa cuida un refineria cu no ta operacional? Den pasado ta companianan priva di siguridad a cuida e refineria, pues no ta mira e necesidad pa haci e cambio di luho aki awo. Hunto cu esaki Hoo ta wordo encarga cu tareanan di liaison pa Merca y Reino cu na e momentonan di crisis aki ta bastante cuestionabel.
Minister Bikker ta laga nos cara na berguensa dilanti Hulanda
Ora cu Parlamentarionan di Hulanda, Secretario di Estado of te hasta Ministernan bisa cu Aruba no por su so, ta riba e tipo decisionnan asina nan ta referi. Gobernantenan ta rabia mesora y bringa cu Hulanda defendiendo nos “autonomia” cu nan mes ta laga bay cada biaha cu tuma e tipo di decisionnan asina. Con nos ta negoshando cu Hulanda pa placa tur luna y nos mes maneho di nos empleado den e top di nos husticia no ta cana bon y ta sigui aumenta gasto. Ta inmoral cu di un grupo bo ta reduci salario y di otro banda ta keda aumenta gasto laboral cu un maneho di nombracion y realoca hende sin vision!
