Recientemente e unidad nobo “Comando Mobil” a yega pa Cuerpo Policial Aruba, cortesia di Aruba Hospitality & Security Foundation (AH&SF). Pa añanan AH&SF ta aloca fondo disponibel percurando pa Polis haya materialnan necesario pa por brinda siguridad optimal. E Comando Mobil ta un parti esencial pa maneho di comunicacion. E ta ekipa cu un sistema moderno y cu tecnologia avansa pa comunica y maneha for di cualkier sitio.
Tecnologia ta sigui avansa y Cuerpo Policial Aruba ta sigui move den e rumbo aki pa por facilita y ekipa e organisacion policial na un otro nivel. “Esaki ta djis un parti cu ainda falta cu tecnologianan moderno cu Cuerpo Policial Aruba mester haya y ta danki cu e sosten di AH&SF y Ministerio di Husticia cu nos por sigui traha hunto pa brinda Aruba y su turismo un siguridad na nivel halto”, asina Alto Comisario di Cuerpo Policial Aruba, Andrew Hoo, a enfatisa.
Meta di AH&SF ta pa brinda siguridad na turismo y na henter pueblo. AH&SF ta aporta financieramente na diferente proyecto pa Cuerpo Policial Aruba, facilitando entre otro adkisicion di material nobo y moderno.