Na final di augustus a yega Aruba e Procurador General nobo Bote ter Steege, kende a cuminsa cu su labornan dia prome di September.
E no ta un desconoci cu e area Caribense, ya cu el a traha algun aña na Boneiro prome cu el a muda pa Aruba. Su dos aña y mei na Boneiro a yuda aclimatisa mas facil na Aruba.
El a siña cu den e area aki mester tin pasenshi pa e cosnan tuma luga y e forma di pensa di personanan Caribense, cu tin biaha ta bisa cosnan cu bo kier scucha y no loke nan ta pensa. “Cu mas combersacion bo ta haya sa kico na ta pensa.”
E cambio no tabata hopi dificil, mirando cu tin un solo ley penal cu tin den Reino y ta haci mas facil pa traha unda cu ta den Reino Hulandes.
PG ter Steege a bisa cu pais Aruba por ta orguyoso cu Ministerio Publico ta un di esnan miho organisa , tin suficiente fiscal y personal den area huridico. “Aruba por ta orguyoso riba Ministerio Publico y mi tin comentario positivo so.”
Den un entrevista amplio cu 24ora.com el a papia di su yegada, su prome impresion di e isla y ministerio publico. Pero tambe el a papia con situacion a bay den 2020 cu pandemia. El a sigura cu e caso IBIS y otronan lo sigui, pero pandemia a afecta e forma con ta atende cu casonan. Asina por ehempel caso IBIS den hof lo sigui den luna di januari. Casonan Flamingo y Avestruz e investigacionnan ta sigui y ta spera cu e investigacion finalisa den 2021.
Pero tambe el a papia di casonan sensible, manera casonan di inmoralidad cu a trece hopi critica, a causa hopi manifestacion debi na malcontento cu demanda (OM) y castigo (Corte). Den su plan e tin tres punto cu e kier concentra riba dje: miho comunicacion cu victimanan durante e proceso penal; mas transparencia entre Ministerio Publico y prensa (pueblo); y encurasha mas inversion den e parti di ehecucion di castigo (principalmente boetnan).
E ta spera cu na final di su periodo e mira atras, y logra e puntonan.