Diahuebs anochi algo prome cu 12:00am, a sosode un caso di hit and run na altura di rotonde di Cumana. Ta entre un Toyota Hilux color oro numera A-37805 y un Toyota Supra numera A-6530. No ta conoci con e accidente a sosode exactamente. Un cos ta sigur, e Hilux a trot bay despues di e impacto cu pensamento di laga e Supra atras manera nada no a pasa.
E chauffeur di e Supra no a basila y a ranca bay su tras. E persecucion a dura basta largo, for di Cumana pa rotonde aeropuerto djey a pasa riba Green Corridor. Na rotonde Mahuma a bay direccion Parkietenbos, djey a sigui pa Barcadera y a termina na e caminda nobo cerca di DTI. E chauffeur di Hilux a para ora cu el a mira luz blauw, na varios ocasion e chauffeur di e Supra a purba para e Hilux pero sin resultado.
Polis di Playa a logra par’e na altura di DTI, reforsa pa polis di Sta. Cruz. A detene e chauffeur mesora, por a nota alcohol den e auto ainda despues di e detencion. Ambos taira na banda robes di e auto tabata completamente plat. E persecucion a termina algun minuut despues di 12:00am. Tabatin un di tres auto durante e persecucion pero no ta conoci si e tambe tabata envolvi den e accidente of no.
