Un welga no ta cumbini ningun hende y a miho cos ta pa sinta na mesa di negociacion. Esaki ta e peticion cu Minister di Salud Dangui Oduber a haci na presidente di sindicato ABV Gina Maduro y na director di Hospital Jacco Vroegop.
E walkout di un grupo di trahado di Horacio Oduber Hospital naturalmente tabatin atencion di Minister di Salud Dangui Oduber. “Nos a wordo informa cu sindicato ABV tin un walkout despues di un reunion general cu su miembronan pa atende algun preocupacion relaciona cu CAO,” tabata e prome reaccion di e mandatario ora cu a puntr’e riba e tema.
Di su palabranan por a compronde cu e no tabata preocupa, ya cu e tabatin mustra di tin tur confiansa cu lo sali di e situacion aki. “Nos semper a considera ABV como un sindicato responsabel, cu semper ta para pa su miembronan. Ta nan derecho pa expresa nan preocupacion y nos ta convenci cu sano huicio lo prevalece.”
El a papia cu ambos y a recomenda tanto Hunta di Directiva y sindicato pa sinta na mesa. Hospital ta hopi importante pa cuido medico na Aruba, pa e servicio cu ta brinda na tur asegurado y pashent. No ta deseabel pa e welga sigui escala. “Nos niun ta desea esey p’esey mi a recomenda e partidonan pa sinta cu otro pa yega na palabracionnan concreto pa sali di e impasse.”
E mandatario a bisa cu semper el a considera ABV como un serio y responsabel pa cual e ta kere cu sintando na mesa, lo por yega na palabracionnan concreto pa e trabounan continua y sigui brinda e servicio di calidad na pashent y aseguradonan.
