Manera 24ora.com a informa den forma di primicia, e siman aki a yega un mucha muhe di 12 aña na Hospital, despues di a pasa den un caso di violacion sexual na su cas situa na Hooiberg. Su mama a hay’e y a bati alarma na Polis, cu a percura pa e criatura yega Hospital pa efectua un “rape kit”. Ayera a detene y awe a present’e dilanti Hues Comisario pa su prolongacion.
E sospechoso di e caso di violacion sexual cu un mucha muhe menor di edad ta e homber, Paul Arthur Marvelle, naci na Haiti dia 10 di november 1982, pues tin 36 aña di edad. A detene, interog’e y despues encarcel’e na Warda di Polis di Santa Cruz.
Desde ayera e seccion di Jeugd en Zeden Politie ta trahando duro riba e caso, pa sigura cu ta acumula tur prueba necesario pa prepara e caso. Contrario na mayoria otro caso, esaki si a bati alarma mesora y como tal, e victima a wordo samina dor di Dokter cu a confirma cu a viol’e y tin prueba di e posibel violado. Esey casi semper falta den e otro casonan, pa convence Hues cu no tin luga na duda cu e abusado a comete tal acto.
Awe ta presenta e pruebanan preliminar na Hues Comisario cu mester verifica cu e detencion ta corecto. Awe no ta bringa e caso, sino ta repasa e detencion y garantisa cu a bisa e sospechoso di su derechonan, ta mira e acusacion y e pruebanan riba mesa. Hues e ora ta dicidi si ta necesario pa e sospechoso sigui deteni. Un proceso normal.
E caso a causa hopi conmocion den comunidad. Pueblo ta sinti cu mester bin un fin na e tendencia aki. Departamento di Asuntonan Social y Hospital a raporta un cantidad di casonan di abuso di mucha tumando luga a base semanal riba nos isla. Mester yega na un balans entre miho conscientisacion banda di un miho persecucion di e sospechosonan envolvi. Di e forma aki prevencion y represion ta topa otro cu e meta pa yega na un solucion di casonan di abuso sexual general, pero specialmente cu menornan di edad como victima.
