Hopi hende ta cana distrai, sin direccion , drentando desesperacion, pasobra nan a perde control di bida. Djis wak rond di nos cuanto hende ta mara na alcohol, causando accidente y problema den famia tur dia.
Hopi hende no ta comprende cu ora Lucifer a wordo saca for di cielo pasobra e a lanta contra Dios y su homber a cambia bira satanas , y hunto cu ne a logra di negocia, manipula y convence un tercera parti di e angelnan pa uni cu ne y nan tur a wordo tira aki bao riba mundo.
Ta p’esey e tabata presente den paraiso caminda e a cuminsa cu su ministerio di maldad, te e dia di awe.(Ezekiel 28 versiculo 12-18)
Hesus a bisa den Juan 10 versiculo 10 cu e ladron ta bini solamente pa horta,pa mata y pa destrui. Ami a bini pa nan tin bida y pa nan tine na abundancia.
Den Mateo capitulo 4 e diabel a purba diferente biaha pa manipula Hesus, prome cu necesidad, di dos pa pone Hesus tenta Dios, di tres cu rikesa di mundo.
Awendia e ta uza e mesun strategia contra tur hendenan riba mundo.
Dios a duna cada hende nan propio boluntad , pa nan por scoge, Dios no a traha robot, cada cos cu nos haci ta nos mes a dicidi di hacie, pero ora nos no ta scucha di Dios, e mundo di scuridad ta dirigi nos.
Y e enemigo ta mik riba tur hende pero su specialidad ta hende den liderazgo, mandatario y mayornan pa asina su atake por ta efectivo.
Pasobra te ainda hopi hende no ta kere cu diabel por influencia nan y pone nan haci cosnan completamente for di boluntad di Dios, ora nan no tin temor di Dios.
Leynan ta wordo cambia pa faborece sclavitud diabolico: Libertad pa bebe, droga, comete fornificacion, adulterio, y bida inmoral ta legalisa mundialmente.
Tur esaki ta pa hende perde respet pa Dios, y si bo kier coregi un persona e tin un ley pa proteha contra e boluntad di Dios, pero un biaha mas nos ta bolbe bisa: Ay di esun cu ta yama malo bon y bon malo, Ay di esun cu ta yama scuridad luz y luz scuridad. Ay di esun cu ta yama locual ta marga dushi, y locual ta dushi marga. (Isaias 5:20). Den un palabra bisa tene cuidao cu contradeci e palabra di Dios.
Den tur cas , tur organisacion, tur pais rond mundo ora Dios su palabra, ta wordo pone un banda pa ley diabolico y boluntad di hende prevalece , bo tin di spera reaccion di Dios, kende no ta drumi.
Mayornan tende bon wak pa den bo cas , e Palabra di Dios tin prioridad, y e boluntad di Dios wordo haci, pa asina abo por drumi trankil anochi, mantene bo yiu den e palabra ,bao di instruccion , y disciplina di Señor.
No permiti distraicion diabolico cual ta hiba na desesperacion drenta bo cas, pasobra esey ta un di e motibo cual hopi ta malo awe.
Di berdad, di berdad , a yega ora pa nos dobla rudia y pidi Dios tene misericordia (2 Kronikanan7:14+15).
