Oracion nunca por ta partidista, ni tampo pa fama, pero oracion semper ta pa duna Gloria na Dios, pasobra e ta un peticion na Dios pa interveni den situacion cu ta dificil pa hende resolve.
Mas humilde nos ta den hacimento di oracion, mas cla nos contesta lo yega pa nos. Nos tur tin di reconoce cu tur locual nos pidi den nomber di Cristo Hesus y nos kere e lo sosode, esey ta e forma cu Dios ta trata cu su yuinan, pa nan Tene fe den Dios.
Den 1 Timoteo capitulo 2 vers 1-4 palabra di Dios ta bisa lo siguiente:
P’esey prome cu tur cos, mi ta exhorta pa suplica, oracion, peticion y gradicimento wordo haci pa tur hende.
Pa reynan y pa tur esunnan cu ta den autoridad, pa nos hiba un bida trankil y keto den tur santidad y dignidad.
Esaki ta bon y aceptabel den bista di Dios.
Na prome luga: Dios ta bisa pa hacie.
Na di dos luga: Pa e pueblo por biba na paz y den santidad.
Na di tres luga: Pasobra e ta agrada Dios, pa tur hende bini na conocemento di e berdad.
E asunto aki ta serio, e situacion ta dificil y ya no ta tempo pa sinta man crusa mas pasobra fe sin obra ta morto.
Oracion nunca no a mata ningun hende, pero oracion semper a trece claridad garantisa den tur asunto.
Oracion lo los cosnan cu hopi tempo ta mara y lo trece pordon den tur curason y asina nos lo bay pa dilanti.
Den tur humildad mester ta posibel pa haci oracion den Parlamento y Ministerraad cu tur hende presente, pasobra caminda Dios ta presente, sabiduria ta presente. Ta pa e motibo ey Rey Salomon a pidi Dios sabiduria pa e por a goberna e pueblo y Dios a dun’e sabiduria.
Rechasa Dios y su palabra ta algo masha peligroso, tambe lesa e deseo di Dios y pasa riba dje manera bo no ta mir’e tin su consecuencia.
Ora nos tene Dios afo, E tambe ta tene nos afo, pasobra Hesus a bisa esun cu rechasa Mi aki na tera tambe lo wordo rechasa pa Mi Tata cu ta na shelo.
Como un pais cu tin Status Aparte, nos tin tur derecho y deber di pone Dios na prome lugar den tur locual cu nos ta haci, den tur instancia di gobierno, pasobra sin Dios ta imposibel goberna locual ta di Dios. Aruba ta pertenece na Dios.
Rey Ezequias a haci oracion na Dios y Dios a libr’e di un situacion mescos cu tin aworaki entre Rusia y Ucrania (Isaias capitulo 37 completo).
Despues el a bira malo y Dios a manda avis’e cu e ta bay muri y un biaha mas el a haci oracion na Dios, recordando Dios riba e cosnan bon cu e haci y Dios a dun’e 15 aña mas di bida (Isaias capitulo 38 completo).
Sabiduria ta nifica pone tur cos den man di Dios y no bay gamble riba experiencia di pasado, ni tampoco locual un grupito ta gusta of propio forsa ni tampoco balansa riba idolatria, pasobra awo si tur hende ta mira cu nos mester di Dios.
Nos no mester di religion, nos mester di Dios Todopoderoso pa yuda nos, nos mester consulta cu Dios y e miho manera ta pa humilia nos mes y haci oracion den cuna di gobierno caminda decisionnan ta wordo tuma.
Y asina habri porta pa Dios tuma control.
Ta posibel haci oracion den Parlamento y den Ministerraad?
