Di e forma cu maldad ta aumenta riba e mundo aki, con ta ataca matrimonio y famia, ta bon pa nos tuma tempo y refleha, pasobra e asunto aki no ta un wega pero un gran berdad.
Na prome luga si bo ta casa of bo ta bay casa, wak bon cerca ken bo ta tuma conseho. No core tuma conseho cerca un persona divorcia, pasobra tur medaya tin su dos banda. Y hopi biaha aunke con yega e persona ta di bo, e por ta bo mama of bo tata, e no ta conta bo tur e berdad. Dobla bo rudia y consulta cu Dios.
Si bo ta casa bo no por ta papia bo secretonan di bo camber, di bo integridad sexual matrimonial cu bo coleganan di trabao of amigonan di bao palo, pasobra e ta algo hopi delicado. Bo ta baha balor di bo matrimonio y bo ta expone bo esposa/esposo na peliger di adulterio.
Y papiando di integridad, mescos cu ta un solo Dios tin y ta E so bo ta sirbi den spirito y berdad. Un homber casa mester tin un solo muhe, y un muhe casa mester tin un solo homber. Pasobra di otro forma bo ta bira un yoyo di diabel, un berguensa pa bo mes y pa bo yiunan.
Tene cuenta: Pasobra awendia tin hopi desviacion, bo matrimonio por ta kibra door di un homber of muhe y hasta door di un persona di mesun sexo. Pasobra diabel ta un gran mentiroso y e ta daña mente di hende (Lesa Romanonan 1:21-32). Tin cos bergonsoso cu ta pasa cu ta solamente nos por haci oracion y pidi Dios tene misericordia.
Esposo y esposa por fabor laga esaki ta un guia di bon conseho pa bo bida matrimonial:
Pone Cristo Hesus na prome luga den boso bida, Stima Cristo Hesus (Mateo 22: 35-38).
Sea yena cu Spirito Santo, boso confortador (Efesionan 6:18).
Corda ken ta boso enemigo, bo esposa/esposo no ta bo enemigo, uni hunto den Guerra Spiritual (Efesionan 6 :10-11-12).
Tuma boso responsabilidad (Josue 1:6-9 y Filipensenan 4:9).
Saca balki for di boso wowo, confesa y arepenti (Mateo 7:3-5).
Pordona otro reafirma boso amor, comforta otro (2 Corintionan 2:5-11).
Papia palabra di bida cu otro tanto esposa/esposo (Efesiosnan 4:29) (Proverbionan 18:21).
Pone interes di otro prome den e poder di Hesus Cristo ( Filipensenan 2:1-5).
Esposo stima y cuida bo esposa cu e amor di Cristo Hesus (Efesionan 5;25-33 y 1 Pedro 3:7).
Esposa respeta bo esposo ( 1 Pedro 3:1-6).
Tene bruheria leu for di boso matrimonio (Isaias 8:19).
Pa esunnan cu tin pensa di casa:
No uni boso mes den yugo desigual, cu e incredulonan (no creyente), pasobra ki compañerismo tin den husticia y inhusticia, y ki comunion luz tin cu scuridad.
Prome cu bo casa cu un persona wak pa e persona ta stima Dios y respeta su mayornan, pasobra si e no ta stima Dios ni tampoco tin respet pa su mayor abo no por haya respet for di djE. Esaki ta conta pa homber y muhe. Stop di wak bon curpa, bon tipo y placa.
No drenta barco matrimonial cu un abusado/malvado/inmoral y pensa cu despues e ta bay cambia. Esaki ta conta tanto pa homber y muhe. Corda bon cu awendia tin abuso fisico, mental, sexual y verbal y tur tipo di abuso ta laga trauma atras.
Aunke divorcio a bira un negoshi y hende a perde temor di Dios, corda kico ta para skirbi den Malaquias 2:16 tocante adulterio y maltrato di bo esposo/esposa. Señor ta odia Divorcio (lesa Malaquias 2:13-16).
Pidi Dios manda un persona di Su boluntad den bo bida, pasobra Dios semper tin lo miho pa bo, y por fabor warda riba Señor.
