E decision di director di Aruba Airport Authority N.V., Joost Meijs, pa kita un cantidad di trahado for di trabou durante Covid-19, por bira “e clabo riba su cah’i morto”. Minister Dangui Oduber no a sconde su disgusto ayera den Parlamento. E mandatario a adelanta cu Schiphol lo keda pero Joost mester bay!
E cifranan na aeropuerto ta indica cu e pasaheronan ta regresa pero awo ta yenando e vacaturanan cu Joost Meijs mes a crea innecesariamente, door di a kita yen di hende dos aña pasa. “No tabatin ningun motibo ni necesidad ni urgencia pa haci gasto innecesariamente”, asina Minister di Turismo y Salubridad Publico a bisa den Parlamento, durante tratamento di su presupuesto.
Minister di Turismo y Salud Publico, Dangui Oduber, a indica cu a gasta diescinco miyon florin innecesariamente, pasobra te dia di awe e mesun profesionalnan ey, e trahadonan ey por tin nan pan riba mesa. Algun di nan a haya trabou otro caminda, varios di nan te awe no tin trabou. E mandatario a subraya cu e tabata un situacion hopi lamentabel cu sigur e no a aprecia e echo ey y e decision tuma e tempo ey.
A puntra riba e contract cu Schiphol Group pa maneha y opera nos aeropuerto. Relaciona cu renobacion di e contract cu Schiphol Group, ayera e CFO nobo tabata di bishita na Aruba. E tin un aña den e funcion y a haci bishita di cortesia na Minister di Turismo y na minister-president. E tabata un bon reunion, segun Oduber.
Gabinete Wever-Croes II a avisa Schiphol Group cu e deseo ta pa continua cu e acuerdo, pero cu otro condicionnan. “Nos kier negosha cu nan”, tabata palabra dje mandatario. “Un di e condicionnan pa nos ta hopi importante pa nan respeta esaki ta, pa duna Aruba e espacio, oportunidad pa nombra nos mesun CEO.”
N’e momento aki, den e contract actual, Schiphol ta apunta nan CEO. E ta den servicio di Schiphol Group y no den servicio directamente di AAA. E condicion salarial di Wever-Croes norm no ta conta p’e, siendo e ta conta si pa tur otro profesional na Aruba, pero p’e e no ta conta. Den e contract actual ta para cu na dado momento Schiphol tin di prepara, por medio di training y un programa guia p’un CEO di Aruba, un “lands kind”. Esey te awe, despues di diescinco aña, Schiphol Group nunca a cumpli cu ne, segun Minister Dangui Oduber.
E mandatario ta kere cu awo si a yega e momento, di cual Oduber ta kere cu na Aruba tin suficiente Arubiano, profesional, bon capacita, cu bon experencia y por guia nos aeropuerto. Oduber a informa nan tambe cu a yega e momento den e proceso di renegosacion di e contact, pasobra nos kier sigui cu Schiphol. “Nan tabata bon partner pa nos. Nan a comberti un compania cu tabata perde placa tempo di AVP, den un compania cu ta gana placa. Nos deseo ta pa sigui cu nan, solamente e condicionnan nos tin di bay renegosha”, asina e mandatario a bisa e parlamentarionan.
Minister ta spera cu por yega na un acuerdo cu Schiphol Group, cu ambos partido ta beneficia di nan. P’asina finalmente despues di mas di diesseis aña di acuerdo entre Aruba Airport Authority y Schiphol Group, nos por apunta nos propio CEO.
